ஜனாதிபதி மற்றும் நாடாளுமன்றத்தின் பதவிக் காலத்தை மேலும் இரண்டு வருடங்களுக்கு நீடிக்க, சர்வஜன வாக்கெடுப்பை நடத்துமாறு – ஜனாதிபதி ரணில் விக்கிரமசிங்க தலைமையிலான ஐக்கிய தேசியக் கட்சி இன்று (28) யோசனை தெரிவித்துள்ளது.
ஐக்கிய தேசியக் கட்சியின் பொதுச் செயலாளர் பாலித ரங்கே பண்டார இன்று இந்த யோசனையை முன்வைத்தார்.
“நாட்டைக் காப்பாற்றுவதற்கு வாக்கெடுப்பு மூலம் ஜனாதிபதி மற்றும் நாடாளுமன்றத்தின் பதவிக் காலத்தை மேலும் இரண்டு ஆண்டுகள் நீடிப்பது இந்த நேரத்தில் சிறந்த வழியாகும்.
பொருளாதார சீர்திருத்தங்கள் தொடர்பாக சர்வதேச நாணய நிதியம், உலக வங்கி மற்றும் பிற நன்கொடையாளர்களுடன் அரசாங்கம் ஒப்பந்தங்களை எட்டியுள்ளது.
இவற்றினை வெற்றியடையச் செய்வதற்கு – ஜனாதிபதி மற்றும் நாடாளுமன்றத்தின் விதிமுறைகளை நீடிக்க வேண்டும். பொருளாதாரத்தை ஸ்திரப்படுத்துவது எல்லாவற்றையும் விட முக்கியமானது” என்று பாலித ரங்கே பண்டார ஊடகங்களிடம் கூறினார்.
“ஜனாதிபதி மற்றும் நாடாளுமன்றத்தின் பதவிக் காலங்களை நீடிப்பதற்கான சர்வஜன வாக்கெடுப்பை நாங்கள் முன்மொழிகிறோம். ஏனெனில் அதைச் செய்வதற்கான மிகவும் சிறந்த ஜனநாயக வழி இதுவேயாகும்,” என்று அவர் மேலும் தெரிவித்தார்.
