இலங்கையின் உள்நாட்டு எரிவாயு சந்தையில் 90 சதவீத பங்கைக் கொண்டுள்ள ‘லிட்ரோ கேஸ் லங்கா லிமிடெட்’ (Litro Gas Lanka Limited), மாதத்திற்கு சுமார் 20 லட்சம் எரிவாயு சிலிண்டர்களை நிரப்புகிறது என்று கைத்தொழில் மற்றும் தொழில் முயற்சியாண்மை அமைச்சர் சுனில் ஹந்துன்நெத்தி தெரிவித்துள்ளார்.
‘லாவ்ஃப்ஸ் கேஸ்’ (Laugfs Gas) நிறுவனத்தின் எரிவாயு விலை உயர்வு தொடர்பாக எதிர்க்கட்சிகள் முன்வைத்த குற்றச்சாட்டுகளுக்குப் பதிலளிக்கும் வகையில், இன்று (14) நாடாளுமன்றத்தில் அமைச்சர் இந்தத் தகவல்களை வெளியிட்டார்.
‘லாவ்ஃப்ஸ் கேஸ்’ நிறுவனம் மாதத்திற்கு சுமார் 03 லட்சம் சிலிண்டர்களை மட்டுமே நிரப்புகிறது என்றும் அவர் குறிப்பிட்டார்.
இதற்கிடையில், தற்போதைய சந்தை தேவையைக் கருத்தில் கொண்டு, ஒரு லட்சம் புதிய ‘லிட்ரோ’ எரிவாயு சிலிண்டர்களுக்கு ஓடர் செய்யப்பட்டுள்ளதாகவும், அதில் 35,000 சிலிண்டர்கள் டிசம்பர் மாதத்திற்குள் வந்து சேரும் என்றும் அவர் தெரிவித்தார்.
மேலும், 2027-ஆம் ஆண்டுக்கான வரவு-செலவுத் திட்டத்தின் மூலம் பொதுமக்களுக்குப் பல்வேறு நிவாரண நடவடிக்கைகள் அறிமுகப்படுத்தப்பட்டுள்ளதாக அமைச்சர் கூறினார்.
எரிவாயு விலை உயர்வு என்பது, விலைவாசி உயர்வது போன்ற ஒரு பிம்பத்தை மக்கள் மத்தியில் உருவாக்கி, பட்ஜெட்டில் அறிவிக்கப்பட்ட நிவாரண நடவடிக்கைகளின் முக்கியத்துவத்தை மறைக்கும் நோக்கத்தில் எதிர்க்கட்சிகள் செஅவர் குற்றம் சாட்டினார்.
இருப்பினும், இந்தச் சிக்கலைத் தீர்க்க அரசாங்கம் தயாராக இருப்பதாகக் கூறிய அமைச்சர் ஹந்துன்னெத்தி, நுகர்வோர் தாங்கள் விரும்பும் எந்த நிறுவனத்தின் எரிவாயு சிலிண்டரையும் தேர்ந்தெடுத்து வாங்கும் வாய்ப்பை அவர்களுக்கு வழங்க அரசாங்கம் திட்டமிட்டுள்ளதாகத் தெரிவித்தார்.
இத்தகைய நடைமுறையைச் செயல்படுத்த அரசாங்கத்தின் எரிவாயு விநியோகத்தை அதிகரிக்க வேண்டியது அவசியம் என்றும், ‘லிட்ரோ கேஸ்’ நிறுவனம் மூலமாக இது மேற்கொள்ளப்படும் என்றும் அவர் குறிப்பிட்டார்.
எனவே, ‘லாவ்ஃப்ஸ் கேஸ்’ நிறுவனத்தின் விலை உயர்வு என்பது – நாடு தழுவிய எரிவாயு தொடர்பான சிக்கல் அல்ல என்று கூறிய அவர், எதிர்க்கட்சிகள் இதனை ஒரு பெரிய நெருக்கடியாகச் சித்தரிக்க முயற்சிப்பதாகக் குற்றம் சாட்டினார்.