இலங்கை போக்குவரத்து சபை (SLTB) – ஒப்பந்த அடிப்படையில் சாரதிகள் மற்றும் நடத்துநர்களுக்கான 1,037 பணி வெற்றிடங்களை நிரப்புவதற்காக விண்ணப்பங்களைக் கோரியுள்ளது.
இந்த ஆட்சேர்ப்பு நடவடிக்கையில் 788 சாரதி பணிகளும் 249 நடத்துநர் பணிகளும் அடங்கும். அந்தந்தப் பிராந்தியங்களிலிருந்து ஆட்சேர்ப்பு செய்யப்படும் விண்ணப்பதாரர்களுக்கு முன்னுரிமை வழங்கப்படும்.
சாரதி பணியிடங்களுக்கு விண்ணப்பிப்பவர்கள் 21 முதல் 45 வயதுக்குட்பட்டவர்களாகவும், க.பொ.த சாதாரண தரப் பரீட்சையில் 06 பாடங்களில் இரண்டு விசேட சித்திகளுடன் தேர்ச்சி பெற்றவர்களாகவும், மூன்று ஆண்டுகளுக்கும் மேலாக செல்லுபடியாகும் கனரக வாகன சாரதி அனுமதிப் பத்திரம் பெற்றவர்களாகவும் இருக்க வேண்டும். அவர்கள் குறிப்பிடப்பட்டுள்ள உடல் மற்றும் சுகாதாரத் தகுதிகளையும் பூர்த்தி செய்ய வேண்டும்.
நடத்துநர் வெற்றிடங்களுக்கு விண்ணப்பிப்பவர்கள் 18 முதல் 45 வயதுக்குட்பட்டவர்களாகவும், க.பொ.த சாதாரண தரப் பரீட்சையில் கணிதம் மற்றும் தாய்மொழி உட்பட 06 பாடங்களில் இரண்டு விசேட சித்திகளுடன் – சித்தி பெற்றவர்களாகவும் இருக்க வேண்டும்.
தேர்ந்தெடுக்கப்பட்ட சாரதிகளுக்கு மாதந்தோறும் அடிப்படை ஒப்பந்தப் படியாக ரூ. 40,847 வழங்கப்படும். நடத்துநர்களுக்கு 40,008 ரூபாய் அடிப்படை ஒப்பந்தப் படியாக வழங்கப்படும். அத்துடன் ரூ. 17,800 வாழ்க்கைப்படி, மேலதிக நேரக் கொடுப்பனவு மற்றும் ஊக்கத்தொகைப் படிகளும் வழங்கப்படும்.
ஊழியர் சேமநிதிக்கு (EPF) 8% ஊழியர்கள் பங்களிப்பார்கள் என்றும், தொழில் வழங்குநர் 12% பங்களிப்பார் என்றும் இலங்கை போக்குவரத்து சபை (SLTB) தெரிவித்துள்ளது. மேலும் தொழில் வழங்குநர் ஊழியர் அறக்கட்டளைக்கு (ETF) 3% பங்களிப்பார்.
நேர்காணல், செயல்முறைப் பரீட்சை மற்றும் தொடர்புடைய பயிற்சி வகுப்புகளின் முடிவுகளின் அடிப்படையில் ஆட்சேர்ப்பு நடைபெறும். நியமனத்திற்குப் பிறகு பணியிட மாற்றம் இருக்காது என்றும் இலங்கை போக்குவரத்து சபை கூறியுள்ளது.
தெரிவுசெய்யப்படும் விண்ணப்பதாரர்களுக்கு, 30 கிலோமீட்டர் சுற்றளவிற்குள் தங்கள் பணியிடத்திற்குச் சென்று வர பயண அனுமதிகளும் வழங்கப்படும்.
குறிப்பிட்ட படிவத்தின்படி தயாரிக்கப்பட்ட விண்ணப்பங்கள், தலைமை நிர்வாக அதிகாரி, இலங்கை போக்குவரத்து சபை, எண் 200, கிருல்ல வீதி, நாரஹேன்பிட்ட, கொழும்பு 05 என்ற முகவரிக்கு, 07 செப்டம்பர் 2026-க்குள் வந்து சேரும்படி பதிவுத் தபால் மூலம் அனுப்பப்பட வேண்டும்.
விண்ணப்பிக்கும் பதவி மற்றும் மாவட்டம் ஆகியவை உறையின் மேல் இடது மூலையில் தெளிவாகக் குறிப்பிடப்பட வேண்டும். விண்ணப்பதாரர்கள் நேர்காணலின் போது தங்களின் பாடசாலை இறுதிச் சான்றிதழைச் சமர்ப்பிக்க வேண்டும். முழுமையற்ற விண்ணப்பங்கள் அல்லது பரிந்துரைக்கப்பட்ட வடிவத்திற்கு இணங்காத விண்ணப்பங்கள் நிராகரிக்கப்படும்.