ஈஸ்டர் ஞாயிறு குண்டுவெடிப்புக்குப் பின்னணியில் ‘மூளை’யாகச் செயற்பட்டவரை எதிர்கொள்ள இலங்கை சக்தியற்றது என்று முன்னாள் ஜனாதிபதி மைத்திரிபால சிறிசேன தெரிவித்துள்ளார். அரசாங்கங்கள், ராணுவம் மற்றும் புலனாய்வு அமைப்புகளுக்கு அந்த நபர் நன்கு தெரிந்தவர் என்றும், ஆனால் அவர் தொட முடியாதவர் என்றும் கூறியுள்ளார்.
இலங்கை அறக்கட்டளை நிறுவனத்தில் நடந்த ஒரு நிகழ்வில் உரையாற்றிய முன்னாள் ஜனாதிபதி மைத்திரிபால; “ஈஸ்டர் தாக்குதல்களின் ‘மூளை’யாகச் செயற்பட்டவரைக் கண்டுபிடிக்க அதிகாரிகள் துடித்துக் கொண்டிருந்தாலும், உண்மையை பொதுமக்களுக்கு எளிதில் வெளிப்படுத்த முடியாது” என்றார்.
“இதெல்லாம் எப்படி நடந்தது என்பது பற்றி நான் சிஐடியிடம் எல்லாவற்றையும் சொல்லிவிட்டேன். ஆனால் அதில் எதையும் பொதுமக்களுக்கு வெளிப்படுத்த முடியாது. மூளையாகச் செயல்பட்டவர் என்று அழைக்கப்படுபவரைக் கண்டுபிடிக்க அனைவரும் துடிக்கிறார்கள். ஆனால் உண்மை என்னவென்றால் – அது யார் என்பது அவர்களுக்கு ஏற்கனவே தெரியும். ஒவ்வொரு அரசாங்கமும், ராணுவமும், புலனாய்வு நிறுவனமும் அவரை அறிந்திருக்கிறது. மூளையாகச் செயல்பட்டவர் எங்கே என்று நம்மால் சொல்ல முடிந்தாலும், அதை நாம் எதிர்கொள்ள முடியாது” எனவும் அவர் குறிப்பிட்டார்.
“கடுமையான குற்றங்கள் நடந்துள்ளன. சில வேண்டுமென்றே திட்டமிடப்பட்டன. இந்தத் திட்டங்கள் எனது பெயரை சேற்றில் இழுத்து, எனது அரசாங்கத்தை நாசமாக்கி, எனது கட்சியை அழித்துவிட்டன” என்று அவர் கூறினார்.
புவிசார் அரசியல் மற்றும் இந்தியாவிற்கும் இலங்கைக்கும் இடையில் சமீபத்தில் கையெழுத்திடப்பட்ட பாதுகாப்பு ஒப்பந்தங்கள் குறித்தும் முன்னாள் ஜனாதிபதி கருத்து தெரிவித்தார்.
“இந்தியாவிற்கும் இலங்கைக்கும் இடையிலான புதிய பாதுகாப்பு ஒப்பந்தம் எதிர்காலத்தில் ஒரு பெரிய பிரச்சினையாக இருக்கப் போகிறது. ஜே.ஆர். ஜெயவர்தனவின் காலத்தில் இந்தியா இங்கு பருப்பை போட்டது. மேலும் விடுதலைப் புலிகளின் நடவடிக்கையால், ஜெயவர்தனவை இந்திய-இலங்கை ஒப்பந்தத்தில் கையெழுத்திட அழுத்தம் கொடுத்தனர். மாகாண சபைச் சட்டம் இப்படித்தான் நிறைவேற்றப்பட்டது. ஆனால் கடந்த 11 ஆண்டுகளாக, அந்த சபைகள் செயல்படாமல் உள்ளன. 2,500 க்கும் மேற்பட்ட அதிகாரிகள் சும்மா இருக்கிறார்கள், மேலும் ஒவ்வொரு ஆண்டும் மில்லியன் கணக்கான ரூபாய் வீணடிக்கப்படுகிறது. இந்தப் பிரச்சினைகள் உள்ளிருந்து வரவில்லை” என்று சிறிசேன கூறினார்.
உலகத் தலைவர்களின் கேள்விக்குரிய மனநிலை காரணமாக – உலக அமைதி மற்றும் நிலையான வளர்ச்சி அச்சுறுத்தலுக்கு உள்ளாகியுள்ளது என்றும் முன்னாள் ஜனாதிபதி கூறினார்.
“சில சக்திவாய்ந்த உலகத் தலைவர்கள் மனநலம் பாதிக்கப்பட்டவர்கள். அவர்களால் போர் இல்லாமல் வாழ முடியாது. அவர்களுக்கு போர் மனநிலை இருக்கிறது. உதாரணமாக, நெதன்யாகு. அவர் எப்போதும் யாரையாவது தாக்க முயற்சிக்கிறார். முதலில் பலஸ்தீனம், பின்னர் ஈரான்.
ஈரான் இஸ்ரேலைத் தாக்கியபோது, அமெரிக்கா தாக்குதல்களைத் தொடங்கியது. போருக்குச் செலவிடப்பட்ட பணம் அனைத்தும் உலகின் ஏழைகளுக்கு உதவப் பயன்படுத்தப்பட்டால் எப்படியிருக்கும் என்று கற்பனை செய்து பாருங்கள். 25 அல்லது 30 ஆண்டுகளுக்கு முன்பு நான் அமெரிக்கா மற்றும் ஐரோப்பாவிற்குச் சென்றபோது, தெருக்களில் பிச்சைக்காரர்களைப் பார்த்ததில்லை. ஆனால் இப்போது, அவர்கள் எல்லா இடங்களிலும் உள்ளனர். இந்தப் போர் மனநிலைதான் இதற்கு வழிவகுத்தது. இதுதான் ஒரு உண்மையான பிரச்சனை” எனவும் அவர் தெரிவித்தார்.