உள்ளூராட்சித் தேர்தலை அறிவிக்கும் திகதி, அதைத் தொடர்ந்து வேட்புமனுக்கள் கோரப்படும் திகதி ஆகியவை வரவு – செலவுத் திட்ட விவாதம் முடிந்த பின்னரே அறிவிக்கப்படும் என்று தேர்தல் ஆணைக்குழு தெரிவித்துள்ளது.
வரவு – செலவுத் திட்ட விவாதத்திற்குப் பிறகு வேட்புமனுக்களை அழைக்க வேண்டும் என்று, தேர்தல் ஆணைக்குழுவிடம் எதிர்க்கட்சிகள் கோரிக்கை விடுத்துள்ள நிலையில், தேர்தல் திகதியை முன்கூட்டியே அறிவிக்க வேண்டும் என்று அரசாங்கம் வலியுறுத்தியுள்ளது.
இந்த நிலையில் டெய்லி மிரரிடம் பேசிய தேர்தல் ஆணைக்குழுத் தலைவர் ஆர்.எம்.ஏ.எல். ரத்நாயக்க, உள்ளூராட்சி சபைத் தேர்தல்கள் தொடர்பில், தேர்தல் ஆணைக்குழு சுயாதீனமாகவும், வெளிப்புற செல்வாக்கு அல்லது வரவு – செலவுத் திட்டம் மற்றும் அரசியல் அழுத்தம் போன்ற காரணிகளின் குறுக்கீடு இல்லாமல் தனது முடிவை எடுக்கும் என்று கூறியுள்ளார்.
“எதிர்க்கட்சிகள் வேட்புமனுக்களை அழைப்பதற்கு கடைசி தருணம் வரை நீடிப்பு கோரியுள்ளன. நாடாளுமன்றத்தில் வரவு – செலவுத் திட்ட செயல்முறை முடியும் வரை அறிவிப்பை தாமதப்படுத்த ஆணைக்குழுவை வலியுறுத்தியுள்ளன. இதற்கு நேர்மாறாக, தேசிய மக்கள் சக்தி – முன்கூட்டி அறிவிக்குமாறு வலியுறுத்தியது” என்று அவர் தெரிவித்துள்ளார்.
“நாங்கள் அனைத்து பரிந்துரைகளையும் கணக்கில் எடுத்துள்ளோம். இருப்பினும், ஒரு சுயாதீன அமைப்பாக, உள்ளூராட்சி தேர்தல் சட்டத்திற்கு ஏற்ப தொடர்புடைய திகதி அறிவிக்கப்படும்” என்று அவர் உறுதியளித்துள்ளார்.
வரவு – செலவுத் திட்ட குழு நிலை விவாதம் பெப்ரவரி 27 ஆம் திகதி முதல் மார்ச் 21 ஆம் திகதி வரை நடைபெறவுள்ளமை குறிப்பிடத்தக்கது.
2023 ஆம் ஆண்டு நடைபெறவிருந்த உள்ளாட்சித் தேர்தல், வேட்புமனு தாக்கல் செய்யப்பட்ட பின்னர் ஒத்திவைக்கப்பட்டது. பல அரசியல் கட்சிகள் இதை எதிர்த்து நீதிமன்றத்தில் வழக்குத் தொடர்ந்தன. மேலும், 2025ஆம் ஆண்டுக்கான தேர்தலுக்கு அதே வேட்புமனு பட்டியலைப் பயன்படுத்துவது நியாயமற்றது என்று வாதிட்டன. இதற்கு பதிலளிக்கும் விதமாக, நாடாளுமன்றத்தில் மூன்றில் இரண்டு பங்கு பெரும்பான்மையின் அங்கிகாரத்துடன் மட்டுமே புதிய வேட்புமனு தாக்கல் செயல்முறையை தொடர முடியும் என்று உச்ச நீதிமன்றம் தீர்ப்பளித்தது.
இதற்கிடையில், 2023 உள்ளாட்சித் தேர்தலுக்கு வைப்புத்தொகை செலுத்திய 80,000 க்கும் மேற்பட்ட வேட்பாளர்களுக்கு சுமார் 60 மில்லியன் ரூபாய் மதிப்புள்ள வைப்புத்தொகையைத் திருப்பித் தரும் பணியில் ஈடுபட்டுள்ளதாகவும் தேர்தல் ஆணைக்குழுத் தலைவர் கூறியுள்ளார்.
இதையும் காணுங்கள்