கல்முனை வைத்தியசாலை ஆடை விவகாரம்: முன்னாள் ராஜாங்க அமைச்சர் ஹரீஸ் மற்றும் அர்ச்சுனா எம்.பிக்கு எதிராக, டொக்டர் சுகுணன் செய்த முறைப்பாட்டுக்கு அமைய வழக்குத் தாக்கல்

– நூருல் ஹுதா உமர் –

கல்முனை ஆதார வைத்தியசாலையில் நியமனம் பெற்ற முஸ்லிம் பெண்களின் ஆடை அணியும் உரிமை தொடர்பான விவகாரத்தில், கருத்துக்களை வெளியிட்ட முன்னாள் ராஜாங்க அமைச்சர் சட்டத்தரணி எச்.எம்.எம். ஹரீஸ் மற்றும் நாடாளுமன்ற உறுப்பினர் அர்ச்சுனா ராமநாதன் உள்ளிட்டோருக்கு எதிராக தாக்கல் செய்யப்பட்டுள்ள வழக்கு, எதிர்வரும் 28ஆம் திகதிக்கு ஒத்திவைக்கப்பட்டுள்ளது.

கல்முனை ஆதார வைத்தியசாலை பணிப்பாளர் டொக்டர் கு. சுகுணன், தனக்கு எதிராக சமூக வலைத்தளங்களில் பதிவுகளை வெளியிட்டதாகக் கூறி, நிகழ்நிலை காப்புச் சட்டத்தின் கீழ் செய்த முறைப்பாட்டுக்க அமைவாக, மட்டக்களப்பு நீதிவான் நீதிமன்றில் இந்த வழக்கு தாக்கல் செய்யப்பட்டுள்ளது.

குறித்த வழக்கு இன்று (22) மட்டக்களப்பு நீதவான் அண்ணத்துரை தர்ஷினி முன்னிலையில் விசாரணைக்கு எடுத்துக்கொள்ளப்பட்டது.

இதன்போது வழக்காளி சார்பில் சிரேஷ்ட சட்டத்தரணி லக்சான் டயஸ் உள்ளிட்ட சட்டத்தரணிகள் முன்னிலையாகி தமது சமர்ப்பணங்களை முன்வைத்தனர்.

வழக்கில் நிபந்தனைக்கு உட்பட்ட கட்டளை ஒன்றை பிறப்பிப்பதா இல்லையா என்பது தொடர்பில் தீர்மானிப்பதற்காக, வழக்கு விசாரணையை எதிர்வரும் 28 ஆம் திகதிக்கு நீதிமன்றம் ஒத்திவைத்துள்ளது.