எதிர்வரும் ஜனாதிபதித் தேர்தலில் – ரணில் விக்ரமசிங்கவிற்கு ஆதரவளிக்கவுள்ளதாக நீர்ப்பாசன, வனவிலங்கு மற்றும் வன வளங்கள் பாதுகாப்பு அமைச்சர் பவித்ரா வன்னியாராச்சி இன்று (08) தெரிவித்துள்ளார்.
பொதுஜன பெரமுன கட்சியின் – ரத்தினபுரி மாவட்டத்திலுள்ள பெரும்பாலான உறுப்பினர்கள் எதிர்வரும் ஜனாதிபதித் தேர்தலில் ரணில் விக்ரமசிங்கவுக்கு ஆதரவளிக்குமாறு தமக்கு அறிவித்துள்ளதாக அவர் கூறியுள்ளார்.
“முக்கியமான அரசியல் முடிவுகளை எடுக்கும்போது, என்னுடன் பணியாற்றும் ரத்தினபுரி மாவட்ட மக்கள் மற்றும் கட்சி உறுப்பினர்களுக்கு செவிசாய்க்கும் கொள்கையை நான் எப்போதும் பின்பற்றுகிறேன்” என்றும் அவர் குறிப்பிட்டுள்ளார்.
“மேலும், நாம் அனைவரும் பெரும் தியாகங்களைச் செய்து ஸ்திரப்படுத்திய நமது தாய்நாட்டை – மேலும் கட்டியெழுப்புவதற்கு, நேரடியான மற்றும் யதார்த்தமான முடிவுகளை எடுக்கும் அரசாங்கத் தலைவர் இந்த தருணத்தில் தேவை என்று நான் நம்புகிறேன்” என்றும் பவித்ரா கூறியுள்ளார்.
எனவே, பொதுஜன பெரமுனவில் தொடர்ந்து இருந்து கொண்டு – ரணில் விக்கிரமசிங்கவுக்கு ஆதரவளிக்க தீர்மானித்துள்ளதாகவும் அவர் மேலும் தெரிவித்துள்ளார்.
பொதுஜன பெரமுன கட்சி சார்பில் ஜனாதிபதி வேட்பாளரை நிறுத்துவதற்கான தீர்மானத்தை எடுக்கும் – அந்தக் கட்சியின் கூட்டத்தில் பவித்ரா வன்னியாராச்சி கலந்து கொண்டிருந்தமை குறிப்பிடத்தக்கது.