இந்திய பல்கலைக்கழகத்தில் மேற்படிப்பைத் தொடர அட்டாளைச்சேனை சப்னாஸ், புலமைப் பரிசில் மூலம் தெரிவு

– றிசாத் ஏ காதர் –

அட்டாளைச்சேனையை சேர்ந்த நஸார் முஹம்மட் சப்னாஸ், இந்தியாவிலுள்ள ஆர்.கே. (RK) பல்கலைக்கழகத்தில் சிவில் பொறியியல் கற்கை நெறியை தொடர்வதற்கு, புலமைப்பரிசில் திட்டத்தின் ஊடாக தெரிவு செய்யப்பட்டுள்ளார் .

நான்கு வருடங்களைக் கொண்ட முற்றிலும் இலவசமான இந்தக் கற்கை நெறியினை தொடர்வதற்கான புலமைப் பரிசில் வாய்ப்பினை, அட்டாளைச்சேனையைச் சேர்ந்த நஜீப் டிலாஸ் அஹமட் என்பவரும் பெற்றுள்ளார்.

சப்னாஸ் – இந்தியாவில் தங்கியிருந்து இந்தக் கற்கை நெறியினை தொடரும் 04 வருட காலப்பகுதிக்கான தங்குமிட வசதிக்குரிய செலவுகளை, பொதுஜன பெரமுன கட்சியின் பொதுத் தேர்தல் வேட்பாளரும் கல்முனை தொகுதி அமைப்பாளருமான றிஸ்லி முஸ்தபா பொறுப்பேற்றுக்கொள்வதாக உறுதியளித்துள்ளார்.

இந்தியாவின் ராஜ்கோட் – குஜராத் பகுதியில் உள்ள இந்த பல்கலைக்கழகத்தின் ஊடாக, பல்வேறு கற்கை நெறிகளையும் தொடர்வதற்கு, ஒவ்வொரு வருடமும் புலமைப்பரிசில் திட்டம் மூலம் இலங்கை மாணவர்கள் உள்ளீர்ப்புச் செய்யப்படுகின்றமை குறிப்பிடத்தக்கது.

மேற்படி சப்னாஸ், ‘நாம் ஊடகர் பேரவை’யின் (We journalists forum) உறுப்பினராவார்.