முன்னர் அறிவிக்கப்பட்ட படி, ஊரடங்கு நாளை தளர்த்தப்படாது: ஜனாதிபதி ஊடகப் பிரிவு தெரிவிப்பு

ஊரடங்குச் சட்டம் நாளை திங்கட்கிழமை நாட்டின் அநேகமான மாவட்டங்களில் தளர்த்தப்படும் என ஏற்கனவே அறிவிக்கப்பட்டிருந்த நிலையில், செவ்வாய்கிழமைதான் ஊரடங்கு தளர்த்தப்படும் என, ஜனாதிபதி ஊடகப் பிரிவு தெரிவித்துள்ளது.

விடுமுறையில் உள்ள அனைத்து முப்படையினரும் மீண்டும் பணிக்கு அழைக்கப்பட்டுள்ளதால் – அவர்கள் தமது பணியிடங்களுக்கு உடனடியாகத் திரும்புவதற்கு ஏதுவான முறையில் – நாளை, திங்கள், நாடு தழுவிய ஊரடங்குச் சட்டம் நடைமுறைப்படுத்தப்பட்டுள்ளது என்றும் ஜனாதிபதி ஊடகப் பிரிவு குறிப்பிட்டுள்ளது.

ஏற்கனவே அறிவிக்கப்பட்டிருந்த முறையின்படி ஊரடங்குச் சட்டம், நாளை மறுதினம், செவ்வாய்கிழமையில் இருந்து நடைமுறையில் இருக்கும்.

இதன்படி – கொழும்பு , களுத்துறை , கம்பஹா , புத்தளம் மாவட்டங்களை தவிர்ந்த ஏனைய அனைத்து மாவட்டங்களிலும், 28ஆம் திகதி, செவ்வாய்க்கிழமை காலை 5:00 மணிக்கு தளர்த்தப்படும் ஊரடங்குச் சட்டம் அன்றிரவு 8:00 மணிக்கு மீண்டும் நடைமுறைக்கு வரும்.

இந்த நடைமுறை, மே 01ஆம் திகதி, வெள்ளி, வரை தொடரும் எனவும் ஜனாதிபதி ஊடகப் பிரிவு தெரிவித்துள்ளது.