முன்னாள் அமைச்சரவை அமைச்சர்கள் 16 பேர் மீது, அதிகார துஷ்பிரயோகம் மற்றும் நிதி முறைகேடுகள் தொடர்பான குற்றச்சாட்டுகள் குறித்து ஊழல் தடுப்பு அதிகாரிகள் விசாரணை நடத்தி வருவதாக செய்திகள் தெரிவிக்கின்றன.
முன்னாள் அமைச்சர்கள் மற்றும் நாடாளுமன்ற உறுப்பினர்கள் உட்பட சுமார் 20 அரசியல்வாதிகளின் சொத்துகள் தொடர்பான விசாரணை ஆவணங்களை, பொலிஸ் சொத்துகள் விசாரணைப் பிரிவு, லஞ்ச அல்லது ஊழல் குற்றச்சாட்டுகளை விசாரிக்கும் ஆணைக்குழுவிடம் ஒப்படைத்துள்ளதாக ‘ஸ்வர்ணவாஹினி’ செய்தி தெரிவித்துள்ளது.
பொதுமக்கள் பாதுகாப்பு மற்றும் நாடாளுமன்ற விவகார அமைச்சர் ஆனந்த விஜேபால, பொலிஸ் விசாரணைகளின் போது கண்டறியப்பட்ட அனைத்து தகவல்களும் லஞ்ச ஆணைக்குழுவிடம் கையளிக்கப்பட்டுள்ளதாகக் குறிப்பிட்டுள்ளார்.
இதற்கிடையில், 55-க்கும் மேற்பட்ட அரசியல்வாதிகள் சம்பந்தப்பட்ட லஞ்ச மற்றும் ஊழல் குற்றச்சாட்டுகள் குறித்து, லஞ்ச ஊழல் ஆணைக்குழு தனித்தனியாக விசாரணை நடத்தி வருகிறது.
அந்த அறிக்கையின்படி, நாடு முழுவதும் 500-க்கும் மேற்பட்ட நபர்களின் சொத்துகள் குறித்தும் விசாரணை நடைபெற்று வருகிறது. இதில் சுமார் 60 அரசியல்வாதிகள் மற்றும் முன்னாள் அமைச்சர்களும் அடங்குவர்.
குறிப்பாக, அதிகார துஷ்பிரயோகம் மற்றும் நிதி முறைகேடுகளில் ஈடுபட்டதாகக் கூறப்படும் 16 முன்னாள் அமைச்சரவை அமைச்சர்கள் மீதான விசாரணைகள் – முக்கியத்துவம் பெறுகின்றன.
சமீபத்திய மாதங்களில் மேற்கொள்ளப்பட்ட விசாரணைகளின் ஒரு பகுதியாக, பல அரசியல்வாதிகளும் அவர்களுடன் தொடர்புடைய நபர்களும் கைது செய்யப்பட்டுள்ளனர் என்றும் அந்த அறிக்கையில் குறிப்பிடப்பட்டுள்ளது.
லஞ்சம், ஊழல் மற்றும் சட்டவிரோதமான முறையில் சொத்துகளைச் சேர்ப்பதைத் தடுக்கும் நோக்கில் கொண்டுவரப்பட்ட – புதிய சட்டத் திருத்தங்களின் மூலம், லஞ்ச ஆணைக்குழுவிற்கு விரிவான விசாரணை அதிகாரங்கள் வழங்கப்பட்டுள்ளன.
விசாரணைகள் தொடர்ந்து நடைபெற்று வருகின்றன. அறிக்கையில் குறிப்பிடப்பட்டுள்ள நபர்கள் எவர் மீதும் இதுவரை குற்றங்கள் நிரூபிக்கப்படவில்லை.