தலைப்புச் செய்திகள்

கணினி, தொலைபேசி ஆகியவற்றின் கடவுச்சொற்களை சிஐடி-க்கு வழங்குமாறு சுரேஷ் சாலேக்கு நீதிமன்றம் உத்தரவு

அரச புலனாய்வு சேவையின் முன்னாள் பணிப்பாளர் சுரேஷ் சாலேயை கைது செய்த போது, கைப்பற்றப்பட்ட மடிக்கணினி மற்றும் கைபேசியின் கடவுச்சொற்களை குற்றப் புலனாய்வுத் திணைக்களத்திடம் வழங்குமாறு கொழும்பு கோட்டை நீதவான் நீதிமன்றம், இன்று (01) உத்தரவிட்டது.

சுரேஷ் சாலே கைது செய்யப்பட்ட நேரத்தில், புலனாய்வாளர்கள் அவரின் வாகனத்திலிருந்து அந்த சாதனங்களை மீட்டெடுத்ததாக மேலதிக சொலிசிட்டர் ஜெனரல் திலிப் பீரிஸ் நீதிமன்றத்தில் தெரிவித்ததை அடுத்து இந்த உத்தரவு பிறப்பிக்கப்பட்டது.

அந்த மடிக்கணினி தனது மகளுக்குச் சொந்தமானது என்று சுரேஷ் சாலே கூறியதோடு, புலனாய்வாளர்கள் அவ்விரு சாதனங்களையும் கைப்பற்றுவதற்கு முன்பு அவற்றை தனது அலுவலகத்தில் விட்டுச் செல்ல முயன்றுள்ளார்.

மேலும், மடிக்கணினி மற்றும் கைபேசியை திறப்பதற்குத் தேவையான கடவுச்சொற்களை வெளியிட சுரேஷ் சாலே மறுத்துவிட்டதாகவும் நீதிமன்றத்தில் அரச தரப்புதெரிவித்தது.

சந்தேக நபர், கணினி அமைப்புகளுக்கு அனுமதியின்றி ஊடுருவப் பயிற்சி பெற்ற ஒரு திறமையான ஊடுருவல்காரர் என்றும், நடைபெற்று வரும் விசாரணைக்கு உதவும் வகையில் கடவுச்சொற்களை வழங்குமாறு அவருக்கு உத்தரவிட வேண்டும் என்றும் பீரிஸ் வாதிட்டார்.

சுரேஷ் சாலேவுக்காக ஆஜரான ஜனாதிபதி சட்ட ஆலோசகர் ஷவிந்திர பெனாண்டோ, அத்தகைய உத்தரவைப் பிறப்பிக்க நீதவான் நீதிமன்றத்திற்கு சட்டப்பூர்வ அதிகாரம் இல்லை என்று வாதிட்டு, அந்தக் கோரிக்கைக்கு ஆட்சேபனை தெரிவித்தார்.

இருப்பினும், குற்றவியல் நடைமுறைச் சட்டத்தின் 124-வது பிரிவின் கீழ், குற்றவியல் விசாரணைகளை எளிதாக்குவதற்குத் தேவையான உத்தரவுகளைப் பிறப்பிக்க நீதிமன்றத்திற்கு அதிகாரம் உள்ளது என்று கொழும்பு கோட்டை நீதவான் பாசன் அமரசேகர தீர்ப்பளித்தார்.

அதன்படி, கடவுச்சொற்களை குற்றப் புலனாய்வுத் திணைக்களத்துக்கு வழங்குமாறு சுரேஷ் சாலேவுக்கு நீதவான் உத்தரவிட்டார்.

இந்த வழக்கு செப்டம்பர் 2-ஆம் திகதிக்கு ஒத்திவைக்கப்பட்டதுடன், அடுத்த விசாரணை நாளில் சாலேயை வீடியோ காட்சி வாயிலாக ஆஜர்படுத்த வேண்டும் என்றும் நீதிமன்றம் உத்தரவிட்டது.