அனர்த்தத்தினால் ஏற்பட்ட பயிர் சேதங்களுக்கு நஷ்டஈடு: விவசாய பிரதியமைச்சர்

விவசாயிகளுக்கு ஏற்பட்ட பயிர் சேதங்களுக்காக, ஹெக்டேர் ஒன்றுக்கு ஒரு லட்சம் ரூபா பூரண இழப்பீடு வழங்குவதற்குத் தேவையான நடவடிக்கை எடுக்கப்படும் என விவசாய மற்றும் கால்நடை பிரதி அமைச்சர் நாமல் கருணாரத்ன தெரிவித்துள்ளார்.

விவசாய நிலத்தை தயார் செய்வதற்காக – பிரதேசத்தில் உள்ள அரச நிறுவனங்களின் ஆதரவைப் பெறுவதற்கு விவசாயிகளுக்கு சந்தர்ப்பம் வழங்கப்பட்டுள்ளதாகவும், அவர் ஊடகங்களிடம் கூறியுள்ளார்.

“அனர்த்தங்களால் அழிவடைந்த பயிர் நிலங்களின் அளவு மற்றும் பாதிக்கப்பட்ட விவசாய குடும்பங்களின் எண்ணிக்கை குறித்து அனைத்தும் தற்போது மதிப்பீடு செய்யப்படுகின்றன. அதன்படி, சேதமடைந்த விளை நிலங்களுக்காக, விவசாயிகளுக்கு ஹெக்டேருக்கு ஒரு லட்சம் ரூபா முழு இழப்பீடு வழங்க அரசாங்கம் கடமைப்பட்டுள்ளது.

அரசாங்கம் என்ற வகையில் அந்த கடமையையும் பொறுப்பையும் நிச்சயமாக நிறைவேற்றுவோம். நெற்பயிர்கள் சுமார் ஒரு அடி, இரண்டடி, ஒன்றரை அடிக்கு கீழ் மணலால் புதையுண்டு போயுள்ளன. அதனை சீர் செய்வதற்கு இயந்திரங்களின் உதவி தேவை. அந்த பகுதிகளில் உள்ள பல்வேறு அரசு நிறுவனங்களின் ஒருங்கிணைப்பின் கீழ், அந்த விளைநிலங்களை சீரமைக்கும் பணியை மேற்கொள்ள வேண்டும் என தெரிவித்துள்ளோம்”.

விளைநிலங்களை சீரமைக்கும் போது -தற்போதுள்ள சுற்றறிக்கைகளைப் பற்றி சிந்திக்காமல், புரிந்துணர்வுடன் செயற்படுமாறு அதிகாரிகளுக்கு பணிப்புரை வழங்கப்பட்டுள்ளது” எனவும் விவசாய மற்றும் கால்நடை பிரதி அமைச்சர் நாமல் கருணாரத்ன தெரிவித்தார்.