வைத்தியர்களின் கட்டாய ஓய்வு வயது அறிவிக்கப்பட்டமைக்கு இடைக்காலத் தடை நீடிப்பு

அரச துறை ஊழியர்களின் கட்டாய ஓய்வு தொடர்பான வர்த்தமானி அறிவித்தலில், வைத்தியர்கள் மற்றும் விசேட வைத்தியர்களை உள்ளடக்கியதை இடைநிறுத்தி பிறப்பிக்கப்பட்ட இடைக்கால உத்தரவை மேன்முறையீட்டு நீதிமன்றம் நீடித்துள்ளது.

அதன்படி, மார்ச் 29, 2023 வரை மருத்துவர்கள் மற்றும் சிறப்பு மருத்துவர்களுக்கு கட்டாய ஓய்வு வயது 60 வயது என்பது அமுல்படுத்தப்படாது.

176 விசேட வைத்தியர்களால் தாக்கல் செய்யப்பட்ட ‘ரிட்’ மனுவை பரிசீலனைக்கு எடுத்துக் கொண்ட சோபித ராஜகருணா மற்றும் தம்மிக்க கணேபொல ஆகியோர் அடங்கிய மேன்முறையீட்டு நீதிமன்ற நீதிபதிகள் குழாம் – நேற்று செவ்வாய்க்கிழமை (31) இந்த இடைக்கால உத்தரவை நீடித்துள்ளது.

மனு மீதான விசாரணை மார்ச் 24, 28, 29 ஆகிய திகதிகளுக்கு ஒத்திவைக்கப்பட்டுள்ளது.

பொது நிர்வாக, உள்நாட்டலுவல்கள் மாகாண சபை மற்றும் உள்ளூராட்சி அமைச்சர் என்ற வகையில் – பிரதமர் தினேஷ் குணவர்தன, அரச துறை ஊழியர்கள் 60 வயதிற்குள் ஓய்வு பெறுவதை கட்டாயமாக்கும் அதி விசேட வர்த்தமானி அறிவித்தலை டிசம்பர் 05 ஆம் திகதி வெளியிட்டார்.

அதன்படி அரசு ஊழியர்களின் கட்டாய ஓய்வு வயது ஜனவரி 01, 2023 முதல் அமுலுக்கு வந்தது.

சிறப்பு மருத்துவர்கள் 63 வயது வரை பணியாற்றுவதற்கு முன்பு அனுமதிக்கப்பட்டனர் என, மனுதாரர்கள் தங்களின் ‘ரிட்’ மனுவில் தெரிவித்துள்ளனர்.