சஊதி அரேபியாவில் தற்போது சிறையில் தடுத்து வைக்கப்பட்டுள்ள இலங்கையைச் சேர்ந்த சிவராசா அனோஜனுக்கு – அரச மன்னிப்பு வழங்குவதற்கான நடவடிக்கையை மேற்கொள்ளுமாறு சஊதி அரேபிய ராச்சியத்திடம் அவசரமானதும் மனிதாபிமானமானதுமான கோரிக்கையை, தமிழ் பேசும் 06 அரசியல் கட்சிகளைப் பிரதிநிதித்துவப்படுத்தும் – தமிழ் பேசும் மக்களின் அரசியல் பேரவை முன்வைத்துள்ளதாக, பேரவையின் ஒருங்கிணைப்பாளர் ரா. சாணக்கியன் தெரிவித்துள்ளார்.
அனோஜனுக்கு எதிரான ஆரம்ப தண்டனையை எதிர்த்து அவர் தாக்கல் செய்த மேன்முறையீட்டை விசாரித்த உயர் நீதிமன்றம், அவரது முன்னைய தண்டனையை அதிகரித்ததன் பின்னர் தற்போது அவருக்கு மரண தண்டனை விதிக்கப்பட்டுள்ளதாக தெரிவிக்கப்படுகிறது.
கீழ்நீதிமன்றத்தினால் முதலில் வழங்கப்பட்ட தண்டனை ஐந்து வருட சிறைத்தண்டனையும் அபராதமும் ஆகும். முகம்மது நபியை தூசித்து எழுதியமைக்காக, இந்தத் தண்டனை வழங்கப்பட்டுள்ளது.
சஊதி அரேபிய ராச்சியத்தின் உயர்ந்த நீதிமன்றத்தில் இறுதி மேன்முறையீட்டை மேற்கொள்ளும் வாய்ப்பு இருக்கின்ற போதிலும், அவ்வாறான மேன்முறையீட்டை முன்னெடுப்பதற்கு மிகப்பெரிய சட்டச் செலவுகள் தேவைப்படுவதால், இலங்கையில் மிகவும் பின்தங்கிய சமூக மற்றும் பொருளாதாரப் பின்னணியைச் சேர்ந்த, வெளிநாட்டில் தொழிலாளியாக பணியாற்றிய அனோஜனின் குடும்பத்தினரால் அந்தச் செலவுகளை ஏற்றுக்கொள்வது கடினமானது என்றும் பேரவை சுட்டிக்காட்டியுள்ளது.
மேலும், இந்த வழக்கு தொடர்பான உறுதிப்படுத்தப்பட்ட தகவல்களை நாடாளுமன்றத்திலும் பொதுமக்கள் முன்னிலையிலும் இலங்கை அரசாங்கம் வெளிப்படுத்த வேண்டும் என்றும் பேரவை கோரியுள்ளது.
குறிப்பாக, குற்றமாகக் கூறப்படும் சம்பவத்தின் தன்மை, இதுவரை முன்னெடுக்கப்பட்ட சட்ட மற்றும் ராஜதந்திர நடவடிக்கைகள், அத்துடன் அனோஜனின் தற்போதைய நிலைமை தொடர்பான தெளிவான தகவல்களை அரசாங்கம் வழங்க வேண்டும் எனக் கோரப்பட்டுள்ளது.
அனோஜன் நிரபராதி என்பதிலும், அவர் தொடர்ந்து சமாதானத்தை ஆதரிக்கும் தன்மையுடனும் நடத்தையுடனும் இருந்தவர் என்பதிலும் அரசியல் பேரவையின் பிரதிநிதிகள் தங்களது ஆதரவை வெளிப்படுத்தியுள்ளனர்.
தனது குடும்பத்தினரிடமிருந்தும் சமூகத்தினரிடமிருந்தும் தொலைவில் வெளிநாட்டில் தொழிலாளியாக வாழ்ந்துவரும் நிலையில், இலங்கையில் இடம்பெற்றதாகக் கூறப்படும் விரும்பத்தகாத ஒரு சூழ்நிலைக்கு அவர் உடனடியாக உணர்ச்சிவசப்பட்டு எதிர்வினையாற்றியிருக்கலாம் என்றும் அவர்கள் குறிப்பிட்டுள்ளனர்.
முக்கியமாக, Facebook இல் பதிவிடப்பட்ட கருத்தை அனோஜன் உடனடியாக மீளப்பெற்று, அதனை நீக்கியதுடன், அதற்காக மன்னிப்பும் கோரியிருந்தார் எனவும் பேரவை தெரிவித்துள்ளது. இஸ்லாம் மதத்தை அவமதிக்க வேண்டும் அல்லது புண்படுத்த வேண்டும் என்ற நோக்கத்துடன் அவ்வாறான கருத்தை வெளியிடுவது அவரது இயல்பான குணாதிசயமல்ல என்றும் பிரதிநிதிகள் உறுதிப்படுத்தியுள்ளனர்.
இலங்கைக்கும் சவூதி அரேபியாவுக்கும் இடையில் நீண்டகாலமாக நிலவி வரும் நட்புறவு மற்றும் நல்லுறவை இந்தக் கோரிக்கை சுட்டிக்காட்டுகிறது. இலங்கையின் அபிவிருத்திக்கு சஊதி அரேபியா வழங்கி வரும் உதவிகளை இலங்கை மக்கள் பெரிதும் மதிப்பதாகவும் பேரவை குறிப்பிட்டுள்ளது.
அத்துடன், இஸ்லாமிய உலகில் சஊதி அரேபியா வகிக்கும் முக்கியத்துவத்தையும் சுட்டிக்காட்டியுள்ள பேரவை, தங்களது இந்த வேண்டுகோளை சவூதி அரேபிய ராச்சியம் அனுதாபத்துடனும் மனிதாபிமானத்துடனும் பரிசீலிக்கும் என நம்பிக்கை வெளியிட்டுள்ளது.
எனவே, அனோஜனுக்கு எந்தவொரு தண்டனையும் வழங்காமல் அவரது உயிரைக் காப்பாற்றுமாறும், சவூதி அரேபியா அரசாங்கம் அவருக்கு அரச மன்னிப்பை வழங்குமாறும் தமிழ் பேசும் மக்களின் அரசியல் பேரவை மரியாதையுடன் வேண்டுகோள் விடுத்துள்ளது.
இந்தக் கோரிக்கை இலங்கை வெளிவிவகார அமைச்சருக்கும், கொழும்பிலுள்ள சவூதி அரேபிய தூதரகத்தின் பதில் பொறுப்பாளருக்கும், அத்துடன் றியாத்திலுள்ள இலங்கைத் தூதுவருக்கும் பிரதியாக அனுப்பப்பட்டுள்ளது.