இலங்கையில் வயது வந்தோரில் சுமார் 30 வீதமானோர் மனநலப் பிரச்சினைகளால் பாதிக்கப்பட்டுள்ளதாக மனநல ஆலோசகர் டோக்டர் மதுஷானி டயஸ் தெரிவித்துள்ளார்.
கொழும்பில் இன்று (26) நடைபெற்ற ஒரு நிகழ்ச்சியில் பேசிய டொக்டர் மதுஷானி டயஸ்; பாதிக்கப்பட்டவர்களில் கணிசமான பகுதியினர் 60 அல்லது 65 வயது மற்றும் அதற்கு மேற்பட்டவர்கள் என்று குறிப்பிட்டார்.
இலங்கையின் முதியோர் மக்கள் தொகை வேகமாக அதிகரித்து வருவதாகவும், முதியோர் எதிர்கொள்ளும் மனநலப் பிரச்சினைகள் குறித்த சமூக விழிப்புணர்வு இல்லாததால் ஏராளமான சவால்கள் எழுந்துள்ளதாகவும் அவர் மேலும் கூறினார்.
சமூகம் பெரும்பாலும் வயதானவுடன் தொடர்புடைய சில உளவியல் அறிகுறிகளைச் சுற்றியுள்ள தவறான கருத்துக்களின் அடிப்படையில் முடிவுகளை எடுக்கிறது, அவற்றை சாதாரண நிலைமைகள் என்று அடிக்கடி நிராகரிக்கிறது.
இதன் விளைவாக, நினைவாற்றல் இழப்பு மற்றும் மனச்சோர்வு போன்ற அறிகுறிகள் பெரும்பாலும் முதியவர்களிடையே கவனிக்கப்படுவதில்லை அல்லது புறக்கணிக்கப்படுகின்றன என்று டொக்டர் மதுஷானி டயஸ் சுட்டிக்காட்டினார்.
முதியவர்களிடையே மனநலப் பிரச்சினைகள் அதிகமாக இருப்பது அவர்களின் வாழ்க்கைத் தரத்தை மோசமாக பாதித்துள்ளததாகவும், உடல் சிக்கல்களின் அதிகரிப்புக்கு பங்களித்துள்ளதாகவும் அவர் மேலும் குறிப்பிட்டார்.
மேலும், 1999 ஆம் ஆண்டு தேசிய மனநல நிறுவனத்தில் வயதான நோயாளிகளுக்காக அர்ப்பணிக்கப்பட்ட ஒரு சிறப்புப் பிரிவு நிறுவப்பட்டதாகவும், தற்போது அது ஆண் மற்றும் பெண் நோயாளிகளுக்கு தனித்தனி உள்நோயாளி வார்டுகளை நடைமுறைப்படுத்துவதாகவும் அவர் கூறினார்.
“தீர்காயு” என்ற பகல்நேர சிகிச்சை மையம் சமீபத்தில் நிறுவப்பட்டதாகவும், இது வயதான நோயாளிகளுக்கு மனநல மற்றும் நடத்தை சிகிச்சை அடிப்படையிலான வைத்திய ஆலோசனைகளை வழங்குகிறது என்றும் அவர் குறிப்பிட்டார்.
தனிமை மற்றும் சமூக தனிமைப்படுத்தல்
உலகெங்கிலும் உள்ள சமூகங்கள் எதிர்கொள்ளும் ஒரு தீவிரமான மற்றும் ஆபத்தான உலகளாவிய நிலையாக தனிமை மற்றும் சமூக தனிமைப்படுத்தல் உருவெடுத்துள்ளதாகவும், உலக சுகாதார நிறுவனம் அவற்றை ஒரு பொது சுகாதாரப் பிரச்சினையாக அதிகாரப்பூர்வமாக அங்கீகரித்துள்ளதாகவும் மனநல ஆலோசகர் டொக்டர் மதுஷானி டயஸ் கூறினார்.
இலங்கையின் இளைய மக்கள்தொகையின் அதிகரித்து வரும் இடம்பெயர்வு காரணமாக, நாட்டில் மீதமுள்ள முதியோர் மக்கள் தொகை – இந்த நிலைமைகளுக்கு ஆளாக நேரிடும் என்று அவர் குறிப்பிட்டார்.
வெளிநாடுகளில் வசிக்கும் பிள்ளைகள் முடிந்தவரை, வீடியோ அழைப்புகள் அல்லது தொலைபேசி உரையாடல்கள் மூலம் – தங்கள் பெற்றோருடன் வழக்கமான தொடர்பைப் பேண வேண்டும் என்று அவர் வலியுறுத்தினார்.
மேலும், தனிமை மற்றும் சமூக தனிமையால் எழும் மனநலப் பிரச்சினைகளை அனுபவிக்கும் முதியவர்கள், முடிந்தவரை நண்பர்கள் மற்றும் உறவினர்களுடன் தீவிரமாக ஈடுபடவும், தன்னார்வ நடவடிக்கைகளில் பங்கேற்கவும் ஊக்குவிக்கப்பட வேண்டும் என்றும், இதனால் அவர்கள் அதிக நிறைவான வாழ்க்கையை வாழ முடியும் என்றும் அவர் கூறினார்.
இலங்கையில் முதியோர் மனநலப் பராமரிப்பு சேவைகளில் முக்கிய சவால்கள்
இலங்கையில் முதியோர்களிடையே மனநலப் பிரச்சினைகள் – ஒரு குறிப்பிடத்தக்க பொது சுகாதாரப் பிரச்சினையாக மாறியுள்ள போதிலும், போதுமான பாதுகாப்பு மற்றும் ஆதரவுக் கட்டமைப்பு இல்லாதது ஒரு பெரிய சவாலாகவே உள்ளது என்றும் மனநல ஆலோசகர் டொக்டர் மதுஷானி டயஸ் சுட்டிக்காட்டினார்.
தனியாக வாழும் முதியவர்கள் அடிக்கடி தொடர்ச்சியான பொருளாதார மற்றும் சமூக சிரமங்களை எதிர்கொள்கிறார்கள் என்றும், அரசு மற்றும் சமூகம் இரண்டிலிருந்தும் போதுமான ஆதரவு இல்லாமை, இந்தப் பிரச்சினைகளை அதிகப்படுத்துகிறது என்றும் அவர் மேலும் விளக்கினார்.
எனவே, இலங்கையின் முதியோர் எதிர்கொள்ளும் மனநல சவால்களை நிவர்த்தி செய்வதற்கும் நிர்வகிப்பதற்கும் பயனுள்ள வழிமுறைகளை நிறுவுவது அரசாங்கத்தின் பொறுப்பாகும் என்று டொக்டர் மதுஷானி டயஸ் மேலும் தெரிவித்தார்.