
பாடசாலை பாடத்திட்டத்தில் ஆணுறை பயன்பாடு, முன்-வெளிப்பாடு தடுப்பு (PrEP), மற்றும் பிந்தைய-வெளிப்பாடு தடுப்பு (PEP) உள்ளிட்ட எச்ஐவி/பாலுறவால் பரவும் நோய் (HIV/STI) தடுப்பு நடவடிக்கைகள் பற்றிய விடயதானங்களை சேர்ப்பதற்கு, சுகாதார அமைச்சின் தேசிய பாலுறவு நோய்/எயிட்ஸ் கட்டுப்பாட்டுத் திட்டம் பரிந்துரைத்துள்ளது.
அதன்படி, 10 ஆம் வகுப்பு விஞ்ஞானப் பாடப்புத்தகத்தில் எச்ஐவி/பாலியல் நோய் தடுப்பு நடவடிக்கைகளை அறிமுகப்படுத்த உள்ளது.
தற்போதைய பாடத்திட்டத்திலுள்ள இடைவெளிகளை நிவர்த்தி செய்து, மாணவர்களுக்கு வயதுக்கு ஏற்ற, சான்றுகள் சார்ந்த அறிவை வழங்குவதே இந்த நடவடிக்கையின் நோக்கமாகும்.
தற்போது, விஞ்ஞானம் மற்றும் சுகாதாரம் மற்றும் உடற்கல்வி பாடப்புத்தகங்கள் குறிப்பிட்ட உயிரிமருத்துவ தடுப்பு முறைகளை விவரிக்காமல், ‘பொறுப்பான பாலியல் நடத்தை’ மூலம் எச்ஐவி-யைத் தடுக்க முடியும் என்று மட்டுமே குறிப்பிடுகின்றன என்று பால்வினை நோய்கள் தொடர்பாக (Venereologist) ஆலோசகர் டொக்டர் வினோ தர்மகுலசிங்க தெரிவித்துள்ளார்.
“தேசிய எய்ட்ஸ் கவுன்சில் மற்றும் ஆணுறை ஊக்குவிப்புக் குழுவின் சமீபத்திய மதிப்பாய்வின்படி, இந்த விவரங்கள் இல்லாதது – மாணவர்களுக்கு முக்கிய தடுப்பு உத்திகள் குறித்து போதுமான அளவு தகவல்களை அளிக்கவில்லை என்பதை வலியுறுத்தியது” என்றும் அவர் கூறியுள்ளார்.
2024 உலகளாவிய பாடசாலை சுகாதார கணக்கெடுப்பின் ஆராய்ச்சியானது, மேற்படி சீர்திருத்தத்தின் அவசியத்தை அடிக்கோடிட்டுக் காட்டுகின்றன என்று அவர் மேலும் விளக்கினார்.
“63% மாணவர்கள் மட்டுமே எச்ஐவி அல்லது எயிட்ஸ் பற்றி கேள்விப்பட்டதாகக் கூறினர். இது தொடர்பான அறிவு 2016 இல் 77% ஆக இருந்துள்ளது. இதேபோல், வகுப்பில் எச்ஐவி தொற்றைத் தவிர்ப்பது எப்படி என்று கற்பிக்கப்பட்ட மாணவர்களின் எண்ணிக்கை 2016 இல் 67.1% ஆக இருந்தது, 2024 இல் வெறும் 44.2% ஆகக் குறைந்தது. பாலியல் உறவுகளில் ஈடுபட்டதாக ஒப்புக்கொண்ட மாணவர்களில் 4.6% பேர், சரியான நேரத்தில் கல்வி கற்பதற்கான அவசியத்தை அடிக்கோடிட்டுக் காட்டுகிறார்கள்” அவர் குறிப்பிட்டார்.
இந்த கவலைகளை நிவர்த்தி செய்ய, சுகாதார மேம்பாட்டு பணியகம் யுனெஸ்கோ வழிகாட்டுதல்களுடன் இணைந்து, வாழ்க்கையைக் கற்றுக்கொள்வோம் என்ற தலைப்பில் ஒரு புதிய விரிவான பாலியல் கல்வி தொகுப்பை உருவாக்கி வருகிறது. ஒரு உயிரியல்-உளவியல் சமூக மாதிரியை அடிப்படையாகக் கொண்டு, இந்த திட்டம் மாணவர்கள் நடத்தை அபாயங்களை சந்திப்பதற்கு முன்பு – வயதுக்கு ஏற்ற அறிவு மற்றும் திறன்களுடன் அறிவூட்ட வடிவமைக்கப்பட்டுள்ளது.
2024 ஆம் ஆண்டில், 264 பாடசாலை சுகாதாரத் திட்டங்கள் பாலியல் நோய் பரவல் தடுப்பு கிளினிக்குகளால் நடத்தப்பட்டன, இது நாடு முழுவதும் 54,000 க்கும் மேற்பட்ட மாணவர்களைச் சென்றடைந்தது என்றும் டொக்டர் வினோ தர்மகுலசிங்க குறிப்பிட்டார்.

பாடத்திட்ட சீர்திருத்தத்துடன் கூடுதலாக, கல்வி அமைச்சு ஆசிரியர் பயிற்சிக்கும் முன்னுரிமை அளிக்கும்.
“ஆசிரியர்கள் மற்றும் பாடசாலை ஆலோசகர்கள் எச்.ஐ.வி தடுப்பு உத்திகள் குறித்த முன் சேவை மற்றும் சேவையில் பயிற்சி பெற வேண்டும். இதனால் அவர்கள் நம்பிக்கையுடனும் நிலைத்தன்மையுடனும் பாடங்களை வழங்க முடியும்” என்று அவர் மேலும் தெரிவித்தார்.
இருப்பினும், இந்த பரிந்துரைகளுக்கு கல்வி அமைச்சு இன்னும் பதிலளிக்கவில்லை.



