மயில் கட்சிக்குள் தொடர்கிறது இழுபறி: போலி மாநாடு நடத்துவற்கு றிஷாட் முற்படுவதாக, செயலாளர் ஹமீட் குற்றச்சாட்டு

– எஸ். அஷ்ரப்கான், எம்வை. அமீர் –

அகில இலங்கை மக்கள் காங்கிரஸ் தலைவர் அமைச்சர் றிஷாட் பதியுதீன் கட்சி யாப்பின் சரத்துக்களை மீறி ஒரு போலியான பேராளர் மாநாடு ஒன்றைக் கூட்ட முற்படுகின்றார் என அந்தக் கட்சியின் செயலாளர் வை.எல்.எஸ். ஹமீட் குற்றம் சாட்டியுள்ளார்.

கட்சி யாப்பின் சரத்துக்களை மீறி, இவ்வாறு பிழையான நடவடிக்கைகளில் ஈடுபட வேண்டாம் என்று றிஷாட் பதியுத்தீனுக்கு எழுத்து மூலம் அறிவித்துள்ளதாகவும் ஹமீட் சுட்டிக்காட்டியுள்ளார்.

இவ்விடயம் தொடர்பில் அவர் மேலும் தெரிவிக்கையில்;

முன்பும், இது போன்று றிஷாட் பதியுத்தீன் கட்சியின் யாப்பை மீறி நடந்திருதிருந்தார் என்பதும் குறிப்பிடத்தக்கது. கட்சியின் உயர்பீடக் கூட்டத்தை நடத்துவதற்குரிய ‘கோரம்’ இல்லாத நிலையில், கட்சியின் அதி உயர்பீட அங்கத்தவர்கள் அல்லாதவர்களை கொண்டுவந்து கையொப்பம் வைக்க வைத்து, கூட்டமொன்றினை நடத்தி, தேர்தல் ஆணையாளருக்கு போலியாக கடிதம் எழுதியிருந்தார். அந்த விடயத்தில் பொய் தோற்று ,நீதியும் சத்தியமும் வென்றதை மக்கள் அறிவார்கள்.

நேர்மை என்பது ஒரு மனிதனின் அடிப்படையிலிருந்து வர வேண்டும். ஆனால் தில்லு முல்லுகளை தன்னுடைய இயற்கை குணமாகக் கொண்டவர்கள், சில காலம் மக்களை ஏமாற்றலாம். ஆனால் எக்காலமும் ஏமாற்ற முடியாது.

சில சமூக வலைத்தளங்களும், சில ஊடகங்களும் தம் கைவசம் இருக்கின்றது என்பதற்காக, பொய்க்கும் அசத்தியத்திற்கும் உறை போட்டு, அவற்றை உண்மையாகவும் சத்தியமாகவும் மக்களுக்கு காட்ட முற்படுகின்ற முயற்சி நீண்ட காலம் பலிக்காது.

போலியான பேராளர் மாநாடுகளைக் கண்டு கட்சியின் அங்கத்தவர்கள், ஆதரவாளர்கள் குழப்பமடையத் தேவையில்லை. கட்சியின் யாப்பை மீறிச் செய்கின்ற சதி நடவடிக்கைகளுக்கு எதிராக, கடந்த காலங்களில் எவ்வாறு சத்தியத்தின்  அடிப்படையிலும் சட்டத்தின் அடிப்படையிலும் இறைவனின் துணை கொண்டு  நடவடிக்கை எடுத்தோமோ, அவ்வாறே எதிர்காலத்திலும் இவ்வாறான சதிகள் முறியடிக்கப்படும்.

அதேவேளை, கட்சியின் யாப்பை மீறுகின்றவர்களுக்கு எதிராகவும் அதற்குத் துணை போகின்றவர்களுக்கு எதிராகவும் கடுமையான ஒழுக்காற்று நடவடிக்கை மற்றும் தேவையான சட்ட நடவடிக்கைகளும் எடுக்கப்படும் என்பதையும் மிகவும் உறுதியாகத் தெரிவித்துக் கொள்கின்றேன்” என்றார்.