உண்மையை சமூகத்துக்கு தெளிவுபடுத்த வேண்டும்; பகிரங்க விவாதத்துக்கு வாருங்கள்: மு.கா தலைவருக்கு அமைச்சர் ஹாபிஸ் நஸீர் அழைப்பு

🕔 April 30, 2022

மகால மற்றும் கடந்தகால விவகாரங்கள் தொடர்பில் சமூகத்துக்கு தௌிவு வழங்க ஐக்கிய மக்கள் சக்தியின் நாடாளுமன்ற உறுப்பினர் றஉப் ஹக்கீமை, பிரபலமான தொலைக்காட்சி ஒன்றில் தன்னுடன் பகிரங்க விவாதத்துக்கு வருமாறு முஸ்லிம் காங்கிரஸ் கட்சியின் நாடாளுமன்ற உறுப்பினர் அமைச்சர் ஹாபிஸ் நஸீர் அஹமட் பகிரங்க அழைப்பு விடுத்துள்ளார்.

இதுகுறித்து அவர் வௌியிட்டுள்ள அறிக்கையில் தெரிவிக்கப்பட்டுள்ளதாவது;

நடந்தவற்றை உரியவாறு சமூகத்திடம் ஒப்புவிக்கும் பொறுப்பிலிருந்து நாமிருவரும் நழுவிவிட முடியாது. இதில், யார் குற்றவாளி அல்லது சுற்றவாளி என்பதையும் எவரது பொறுப்புக்கள் சமூகக் கடமைகளிலிருந்து நழுவியது என்பதையும் சமூகமே தீர்மானிக்க வேண்டும். இதற்காக ஒரு பகிரங்க விவாதம் நமக்குள் தேவைப்படுகிறது.

அரசியலமைப்பின் இருபதாவது திருத்தத்துக்கு நான் உட்பட நாடாளுமன்ற உறுப்பினர்களான ஹரீஸ், பைசல் காசிம், தௌபீக் ஆகியோர் ஆதரவளித்த பின்னணியுள்ள பின்புலம், நடைபெற்ற பேச்சுவார்த்தைகள், அவை இடம்பெற்ற இடங்கள் இன்னும் பல கதைகளாகவே உள்ளன. 

இதன் உண்மைத்தன்மையை சமூகத்துக்கு தெளிவுபடுத்த வேண்டிய தேவை உங்களுக்கும் எனக்கும் இருக்கும் என நம்புகிறேன். அதுமட்டுமின்றி ஆதாரபூர்வமாகவும் முழு ஆவணங்களுடனும் சமர்ப்பிக்கப்பட வேண்டிய கடப்பாடு நமக்கு இருக்கிறது. எனவே, இவ்வாறான விடயங்கள் நடப்பதற்கு ஏதுவான காரணிகள் ஏன் ஏற்பட்டது? என்பதை புலப்படுத்துவதும் நமது இருவரின் பொறுப்புக்களில் உள்ளன.

ஆகவே, தன்னுடன் பகிரங்கமானதும், வௌிப்படையானதுமான விவாதத்துக்கு வருமாறு ஐக்கிய மக்கள் சக்தியின் நாடாளுமன்ற உறுப்பினர்  ஹக்கீமுக்கு அழைப்பு தான் அழைப்பு விடுப்பதாகவும் இந்த அழைப்பை நிராகரிப்பதற்கான எந்த நியாயங்களும் அவரிடம் இருக்காது என, தான் நம்புவதாகவும் ஹாபிஸ் நஸீர் தெரிவித்துள்ளார்.

முஸ்லிம் காங்கிரஸின் தீர்மானங்களுக்கு மாறாக அந்தக் கட்சியின் நாடாளுமன்ற உறுப்பினர் நஸீர் அஹமட் செயற்பட்டதாகத் தெரிவித்து, அவரை கட்சியிலிருந்து நீக்குவதாக அண்மையில் முஸ்லிம் காங்கிரஸ் அறிவித்தது.

இந்த நிலையில், மு.காங்கிரஸ் தலைவர் ஹக்கீம் கேட்டுக் கொண்டமைக்கு அமைவாகவே தான் அரசியலமைப்பின் 20ஆவது திருத்தம் உள்ளிட்ட அரசாங்கத்தின் செயற்பாடுகளுக்கு ஆதரவளித்ததாக நஸீர் அஹமட் தெரிவிக்கின்றார்.

Comments

புதிது பேஸ்புக் பக்கம்