திருமணமான பெண்களுக்கான ஆசிய அழகிப் போட்டி: இலங்கைப் பெண் முதலிடம்

இலங்கையைச் சேர்ந் சமந்திகா குமாரசிங்க 2019ஆம்ஆண்டுக்கான திருமணமான ஆசிய அழகியாக முடிசூடப்பட்டுள்ளார்.

மியான்மரில் நேற்று சனிக்கிழமை நடைபெற்ற இறுதிப் போட்டியிலேயே அவர் இந்த கிரீடத்தை தனதாக்கிக் கொண்டதாக மிஷிஸ் ஏசியா இன்டர்நெஷனல் அமைப்பின் இலங்கை தேசிய பணப்பாளர் சமந்த குணசேகர தெரிவித்துள்ளார்.

21 நாடுகளை சேர்ந்தோர் இந்தப் போட்டியில் பங்கேற்றனர்.

வெயங்கொடை பகுதியைச் சேர்ந்த 38 வயதான சமந்திகா குமாரசிங்க, ஒரு பிள்ளையின் தாயாவார்.

2006ஆம் ஆண்டு தொலைக்காட்சி நிகழ்ச்சியொன்றிற்காக அழகு கலை கலைஞராக இந்த துறைக்குள் சமந்திகா குமாரசிங்க பிரவேசித்தார்.

அதனைத் தொடர்ந்து, இலங்கையின் பல முன்னணி விளம்பரங்களிலும் அவர் நடித்துள்ளார்.

விளம்பரங்கள் மாத்திரமன்றி சில தொலைக்காட்சி நாடகங்களிலும் சமந்திகா குமாரசிங்க நடித்துள்ளார்.

இந்த நிலையில், ‘கொழும்பு பேஷன் வீக்’ நிகழ்ச்சியில் அழகு கலைஞராக பங்கு பெற்றிருந்த நிலையிலேயே, சமந்திகா குமாரசிங்க திருமண பந்தத்தில் இணைந்தார்.

அதன்பின்னர், அழகு கலைத்துறையிலிருந்து சிறிது காலம் ஓய்வு பெற்ற அவர், 2019ஆம் ஆண்டுக்கான இலங்கை திருமதி அழகி போட்டியில் பங்குப்பற்றியுள்ளார்.

எனினும், அந்த போட்டியில் அவருக்கு எந்தவித இடமும் கிடைக்காத நிலையில், 2019 ஆசிய திருமதி அழகி போட்டிக்குள் பிரவேசித்துள்ளார்.

இந்த போட்டியிலேயே ஆசிய திருமதி அழகி மற்றும் சிறந்த பாரம்பரிய ஆடை அழகியாகவும் சமந்திகா குமாரசிங்க தெரிவாகி, இலங்கைக்கு பெருமை சேர்த்துள்ளார்.

இலங்கையை சேர்ந்த ஸ்ரீமாலி பொன்சேகா (2015 – 2016 ) மற்றும் நிலு சேனாரத்ன( 2016 – 2017 ) இதற்கு முன்னர் ஆசிய திருமதி அழகி கிரீடத்தை வென்றுள்ளனர்.

2020ஆம் ஆண்டுக்கான திருமதி உலக அழகி கீரிடத்தை இலங்கையைச் சேர்ந்த கெரோலின் ஜுரி கடந்த0 6ஆம் திகதி வென்றிருந்தார்.