கொழும்பு முன்னாள் பிரதம நீதவான் மற்றும் மொரட்டுவை முன்னாள் மாவட்ட நீதிபதி திலின கமகே-வை, பணியிலிருந்து நீதிச் சேவை ஆணைக்குழு நீக்கியுள்ளது.
அவர் மீதான ஒழுக்காற்று நடவடிக்கை விசாரணையில் – அவர் மீது சுமத்தப்பட்ட அனைத்துக் குற்றச்சாட்டுகளிலும் குற்றவாளி எனத் தீர்மானிக்கப்பட்டதைத் தொடர்ந்து, இந்தத் தீர்மானம் மேற்கொள்ளப்பட்டுள்ளது.
விசாரணை முடிவுகள் வரும் வரை பணியிடை நீக்கம் செய்யப்பட்டிருந்த திலின கமகேவுக்கு எதிரான ஒழுக்காற்று நடவடிக்கை விசாரணைகள் நிறைவடைந்ததைத் தொடர்ந்து, இந்த முடிவு எடுக்கப்பட்டது.
மோசடியாகப் பெறப்பட்டதாகக் கூறப்படும் அனுமதிப்பத்திரத்தின் கீழ் ‘சகுரா’ (Sakura) என்ற குட்டி யானையைத் தன்வசம் வைத்திருந்தது தொடர்பான முறைகேடு குற்றச்சாட்டுகள் குறித்து, இந்த ஒழுக்காற்று நடவடிக்கை விசாரணை நடைபெற்றது.
மே 2015-இல் வனவிலங்கு பாதுகாப்புத் திணைக்களத்திடம் ஒப்படைக்கப்பட்ட அந்த யானையை, சட்டவிரோதமாகத் தன்வசம் வைத்திருந்ததாகக் கூறப்படும் விவகாரம் குறித்து, குற்றப் புலனாய்வுத் திணைக்களம் விசாரணையை ஆரம்பித்தது.
கொழும்பில் மேலதிக நீதவானாகப் பணியாற்றி வந்தபோது, 2016-ஆம் ஆண்டில் நீதிச் சேவை ஆணைக்குழு – திலின கமகேவை பணியிடை நீக்கம் செய்தது.
அதனைத் தொடர்ந்து, நொவம்பர் 7, 2019 அன்று, இவ்வழக்கு தொடர்பாக தலின கமகே, சந்திரரத்ன பண்டார யட்டவர மற்றும் இருவர் மீது கொழும்பு மேல் நீதிமன்றத்தில் குற்றப்பத்திரிகைகள் தாக்கல் செய்யப்பட்டன.
இருப்பினும், போதிய ஆதாரங்கள் இல்லை என்பதைக் காரணம் காட்டி, டிசம்பர் 16, 2021 அன்று சட்டமா அதிபர் திணைக்களம் திலின கமகேவுக்கு எதிரான குற்றவியல் வழக்கை வாபஸ் பெற்றது.
ஒழுக்காற்று நடவடிக்கை விசாரணைகள் தனித்தனியாகத் தொடரப்பட்டன. ஜூன் 2025-இல், இக்குற்றச்சாட்டுகள் தொடர்பாக திலின கமகே மீது நீதிச் சேவை ஆணைக்குழு குற்றப்பத்திரிகையைத் தாக்கல் செய்தது.
ஓகஸ்ட் 2025-இல், ஒழுக்காற்று நடவடிக்கை செயல்முறையின் ஒரு பகுதியாக அவரது பணியிடை நீக்கம் தொடர்பான அடுத்தகட்ட நடவடிக்கைகளை ஆணைக்குழு மேற்கொண்டது. ஓகஸ்ட் 1 அன்று திலின கமகேவுக்கு இது குறித்து எழுத்துபூர்வமாக முறையாக அறிவிக்கப்பட்டு, 21 நாட்களுக்குள் தனது பதிலைச் சமர்ப்பிக்குமாறு கேட்டுக்கொள்ளப்பட்டது.