முன்னாள் ஜனாதிபதி மஹிந்த ராஜபக்ஷ மற்றும் முன்னாள் அமைச்சர் பியங்கர ஜெயரத்ன ஆகியோரை – லஞ்சம் அல்லது ஊழல் குற்றச்சாட்டுகள் தொடர்பான விசாரணை ஆணைக்குழுவில் எதிர்வரும் 12ஆம் திகதி ஆஜராகுமாறு அழைப்பாணை விடுக்கப்பட்டுள்ளது.
சர்ச்சைக்குரிய விமான கொள்வனவு தொடர்பான- விசாரணையில் வாக்குமூலங்களைப் பதிவு செய்வதற்காக இந்த அழைப்பாணை விடுக்கப்பட்டுள்ளது.
ஸ்ரீலங்கன் ஏர்லைன்ஸ் நிறுவனத்திற்காக 2013ஆம் ஆண்டில் ஆறு (06) ஏ-330 ரக விமானங்களையும், எட்டு ஏ-350 ரக விமானங்களையும் கொள்முதல் செய்தபோது, 2 மில்லியன் அமெரிக்க டொலர்கள் லஞ்சமாகப் பெறப்பட்டதாகக் கூறப்படும் குற்றச்சாட்டுகள் தொடர்பாக, லஞ்ச ஊழல் ஆணைக்குழு விசாரணையைத் தொடங்கியுள்ளது.
ஸ்ரீலங்கன் ஏர்லைன்ஸ் நிறுவனத்தின் முன்னாள் தலைமைச் செயல் அதிகாரி கபில சந்திரசேன மற்றும் அவரது மனைவி நயோமி விஜேநாயக்க ஆகியோர் மீது இந்தக் குற்றச்சாட்டுகள் சுமத்தப்பட்டுள்ளன.
கபில சந்திரசேன, லஞ்ச ஆணைக்குழுவால் மார்ச் 12 அன்று கைது செய்யப்பட்டு, பின்னர் தொடர் விசாரணைகளுக்காக லஞ்சச் சட்டம் மற்றும் ஊழல் ஒழிப்புச் சட்டத்தின் கீழ் மே 5 வரை விளக்கமறியலில் வைக்கப்பட்டுள்ளார்.
ஏர்பஸ் விமான ஒப்பந்தத்தில் லஞ்சமாகப் பெறப்பட்டதாகக் கூறப்படும் நிதியானது, ஸ்ரீலங்கன் ஏர்லைன்ஸ் நிறுவனத்தின் முன்னாள் தலைமைச் செயல் அதிகாரி கபில சந்திரசேனவால், முன்னாள் ஜனாதிபதி மஹிந்த ராஜபக்ஷ மற்றும் முன்னாள் விமானப் போக்குவரத்து அமைச்சர் பிரியங்கர ஜெயரத்ன ஆகியோரிடம் ஒப்படைக்கப்பட்டது அம்பலமாகியுள்ளது என 2026 மார்ச் 19 அன்று கொழும்பு நீதவான் நீதிமன்றத்தில் லஞ்ச ஒழிப்பு ஆணைக்குழு தெரிவித்தது.
சந்தேக நபரான கபில சந்திரசேன, 2015-ஆம் ஆண்டில் முன்னாள் ஜனாதிபதி மஹிந்த ராஜபக்ஷ விடுத்த வேண்டுகோளைத் தொடர்ந்து, மொத்தம் 60 மில்லியன் ரூபாயை, தலா ரூ. 20 மில்லியன் என மூன்று தவணைகளாக, முன்னாள் ஜனாதிபதியின் பெலியத்த இல்லம் மற்றும் கார்டன் இல்லத்தில் ஒப்படைத்ததாகக் கூறியுள்ளார் என, லஞ்ச ஊழல் ஆணைக்குழு தெரிவித்துள்ளது.
அதன்படி, சர்ச்சைக்குரிய விமான கொள்வனவு தொடர்பான தொடர் விசாரணையின் ஒரு பகுதியாக, வாக்குமூலங்களைப் பதிவு செய்வதற்காக, மே 12 அன்று ஆஜராகுமாறு மஹிந்த ராஜபக்ஷ மற்றும் பியங்கர ஜெயரத்னவுக்கு லஞ்ச ஒழிப்பு ஆணைக்குழு அழைப்பாணை அனுப்பியுள்ளது.