மகிந்த ராஜபக்சவின் உயிருக்கு எந்த அச்சுறுத்தலும் இல்லை என்றும், போர் நடைபெற்ற போது கூட, அப்போதைய ஜனாதிபதி மஹிந்த ராஜபக்ஷவுடன் விடுதலைப் புலிகளுக்கு விசேட தொடர்பு இருந்ததாகவும் பீல்ட் மார்ஷல் சரத் பொன்சேகா தெரிவித்துள்ளார்.
“போரின் போது கூட அவரைக் கொல்லவோ அல்லது குண்டு வீசவோ எந்த முயற்சியும் எடுக்கப்படவில்லை. அவர் தனியாகப் போர் செய்தாரா? நாங்கள் போரிடவில்லையா?” எனவும் அவர் கேள்வி எழுப்பியுள்ளார்.
“2005 இல், மகிந்த ராஜபக்சவின் விஞ்ஞாபனம் போரைக் கண்டித்ததுடன், பிரபாகரனுடனான பேச்சுவார்த்தையின் மூலம் சமாதானத்தை அடைய வலியுறுத்தியது. மகிந்த மீது விடுதலைப் புலிகள் கோபம் கொள்ளவில்லை.
உண்மையில், 2005 ஆம் ஆண்டு, விடுதலைப் புலிகளுக்கு தற்கொலைத் தாக்குதல் படகுகளை கொள்வனவு செய்ய 02 மில்லியன் அமெரிக்க டொலர்கள் வழங்கப்பட்டது. விடுதலைப் புலிகளுடன் மகிந்த ராஜபக்ச குறிப்பிடத்தக்க தொடர்பை பேணி வந்தார். யுத்தம் முடிவடைவதற்கு சற்று முன், பிரபாகரனையும் மற்ற தலைவர்களையும் தப்பிக்க அனுமதிக்கும் வகையில் போர் நிறுத்தத்தை அறிவித்தார்.
இந்தக் காரணங்களால், விடுதலைப் புலிகள் ஒருபோதும் மஹிந்த ராஜபக்ஷவுக்கு அச்சுறுத்தலாக இருக்க மாட்டார்கள்” என்றும் அவர் குற்றம் சாட்டியுள்ளார்.
“போரின் போது ராணுவத் தளபதியாக இருந்த – எனது முழுப் பாதுகாப்பும் 2010ஆம் ஆண்டு ஜனாதிபதித் தேர்தல் முடிவுகள் அறிவிக்கப்பட்ட உடனேயே நீக்கப்பட்டது. அந்த நேரத்தில் எனக்கு பாதுகாப்பு அச்சுறுத்தல்கள் எதுவும் வரவில்லையா? எனவும், அவர் கேள்வியெழுப்பினார்.
தனது சிறைத்தண்டனையின் போது, விடுதலைப் புலிகளின் உறுப்பினர்களாக இருந்த கைதிகளுடன் – தான் தங்க வைக்கப்பட்டிருந்ததாகவும், எந்த சிறப்பு பாதுகாப்பும் தனக்கு இருக்கவில்லை எனவும் சரத் பொன்சேகா கூறினார்.
“தண்டனை அனுபவிக்கும் போது – நான் நீதிமன்றத்தில் ஆஜர்படுத்தப்பட்டபோது, என் உயிரைப் பறிக்க முயன்ற தற்கொலைக் குண்டுதாரியுடன் சென்ற பயங்கரவாதி இருந்த – அதே பெஞ்சில் நானும் அமர்ந்திருந்தேன்” என்று சரத் பொன்சேகா சுட்டிக்காட்டினார்.
முன்னாள் ஜனாதிபதிக்கு எதிராக ஆளில்லா விமானம் மூலம் தாக்குதல் நடத்த திட்டமிட்டுள்ளதாக வெளியான செய்திகள் குறித்து – ஊடகவியலாளர்கள் கேள்வி எழுப்பிய போது, ராஜபக்சவை கொல்ல யாரும் விரும்புவதாக தன்னால் கற்பனை செய்து பார்க்க முடியாது என்று சரத் பொன்சேகா கூறினார்.
“ட்ரோன்கள் விலை உயர்ந்தவை, எம்ஐஜி விமானங்களை விட விலை அதிகம். இவ்வளவு பெரிய செலவில் மஹிந்த ராஜபக்ஷவை குறிவைக்க எந்த காரணமும் இல்லை. அமெரிக்கா அல்லது ரஷ்யா போன்ற நாடுகள் அத்தகைய நடவடிக்கைகளை எடுக்க முடியும், ஆனால் அவரை படுகொலை செய்ய விரும்புவது யார்?
முன்னாள் ராணுவத் தளபதி என்ற வகையில் தற்போது 17 பொலிஸ் உத்தியோகத்தர்கள் மாத்திரமே தனக்கு பாதுகாப்பு வழங்குவதாக சரத் பொன்சேகா குறிப்பிட்டுள்ளார். “முன்னாள் ஜனாதிபதிக்கு 30 பேர் கொண்ட குழு போதுமானது,” என்றும் அவர் தெரிவித்தார்.