தன்னால் தீர்க்க முடியாமல் போன 03 விடயங்கள் குறித்து தன்னுடைய புத்தகத்தில் கோட்டா விபரிப்பு

தனது பதவிக்காலத்தில் தன்னால் தீர்க்க முடியாமல் போன மூன்று முக்கிய விடயங்கள், இலங்கையின் வருங்காலத் தலைவரால் கவனிக்கப்பட வேண்டும் என – முன்னாள் ஜனாதிபதி கோட்டாபய ராஜபக்ஷ தெரிவித்துள்ளார்.

‘சதி’ எனும் தலைப்பில் அவர் வெளியிட்டுள்ள புத்தகத்தில் இந்த விடயத்தை அவர் குறிப்பிட்டுள்ளார்.

சிங்களவர்கள் குறிப்பாக சிங்கள பௌத்தர்கள் பல்வேறு வெளிநாட்டு மற்றும் உள்ளூர் தரப்புக்களால் சாதாரணமாக எடுத்துக் கொள்ளப்படுவதும், புறக்கணிக்கப்படுவதும், ஓரங்கட்டப்படுவதும், தாழ்த்தப்படுவதும் போன்ற பிரச்சினைகளே தன் அதிகாரத்திற்குத் தெரிவு செய்தமைக்கு முதல் காரணம் என, அவர் தெரிவித்துள்ளார்.

இரண்டாவதாக, பொருளாதாரத்தின் சீரழிவு மற்றும் நாட்டின் பாரிய கடன்சுமை என்று குறிப்பிட்டுள்ளார்.

கடைசியாக – சட்டம், ஒழுங்கு, தேசிய பாதுகாப்பு மற்றும் புலனாய்வு துறைகளின் மொத்த தோல்வி என்றும் கூறியுள்ளார். 

‘இந்த தீர்க்கப்படாத பிரச்சினைகளை எதிர்காலத்தில் மற்றொரு தலைவர் கையாள வேண்டும். இந்த தலைவரை விரைவில் இலங்கை கண்டுபிடிக்கும் என்பது எனது தீவிர நம்பிக்கை’ என்றும் அவர் தனது புத்தகத்தில் எழுதியு்ளளார்.

முன்னாள் ஜனாதிபதி கோட்டாபய ராஜபக்ஷ, 2022 ஆம் ஆண்டு மே மாதம், அரசாங்கத்திற்கு எதிரான போராட்டங்கள் காரணமாக ஜனாதிபதி பதவியிலிருந்து வெளியேற்றப்பட்டார். அப்போது அவர் எதிர்கொள்ள நேர்ந்த சோதனையை அவர் தனது புத்தகத்தில் வெளிப்படுத்தியு்ளளார்.

மேலும் அந்தப் புத்தகத்தில்;

‘முன்னர் தெரிவித்தமை போல், இலங்கையின் வெளிநாட்டுக் கடன் பிரச்சினையையும் நான் நேரடியாகக் கையாண்டேன். 2019 ஆம் ஆண்டின் இறுதியில் 54,811 மில்லியன் அமெரிக்க டொலர்களாக இருந்த வெளிநாட்டுக் கடனை 48,731 மில்லியன் அமெரிக்க டொலர்களாக ஜுன் 2022இல் 12 வீதத்தால் குறைத்தேன். சுதந்திரத்துக்குப் பின்னர் இவ்வாறு குறைத்த ஒரே இலங்கைத் தலைவராகவும் ஆனேன்.

நான் மூழ்கும் கப்பலை கைவிட்டதாக சிலர் குற்றம் சாட்டினாலும், நான் ராஜினாமா செய்யும் போது – இலங்கைக்கு நிச்சயமாக எந்த ஆபத்தும் இல்லை. 2022 ஆம் ஆண்டின் முற்பகுதியில் ஏற்பட்ட எரிவாயு, எரிபொருள், மருந்து மற்றும் பிற பொருட்களின் பற்றாக்குறையை நிவர்த்தி செய்வதற்கு தேவையான நடவடிக்கைகள் எனது ஆட்சிக் காலத்திலும், முன்னாள் நிதியமைச்சர் பசில் ராஜபக்ஷவின் ஆட்சிக் காலத்திலும் எடுக்கப்பட்டன.

நான் ராஜினாமா செய்த நாட்களில் கூட மற்ற அத்தியாவசிய பொருட்கள் வந்து கொண்டிருந்தன. நான் ராஜினாமா செய்த சில வாரங்கள் மற்றும் மாதங்களில் வரிசைகளை அகற்றி பொருளாதாரத்தை ஸ்திரப்படுத்தியது இந்தப் பொருட்கள்தான். இந்த நாட்டை வீழ்ச்சியடையச் செய்த பாரியளவிலான வெளிநாட்டு வர்த்தகக் கடனைப் பொறுத்தவரை, இதற்கும் எனக்கும் எனது சகோதரர் மஹிந்தவுக்கும் எந்தத் தொடர்பும் இல்லை என்றும், அதற்குப் பொறுப்பானவர்கள் ஓடியவர்களே என்றும் முன்னைய அத்தியாயத்தில் விளக்கியிருந்தேன்.

2015 மற்றும் 2019ஆம் ஆண்டு காலத்தில் நாட்டை ஆண்டவர்களே இதற்குப் பொறுப்பாகும்.

2022 மார்ச்/ஏப்ரல் மாதங்களில் தொற்றுநோயிலிருந்து நாடு மீண்டு வரத் தொடங்கியபோது, ​​என்னை அதிகாரத்தில் இருந்து வெளியேற்றுவதற்கான வெளிநாட்டு மற்றும் உள்ளூர் சதித்திட்டத்தை நான் புரிந்து கொள்ள தவறினேன்.

முன்னர் கூறியது போல், ஒரு உயிரைக்கூட பணயம் வைப்பது மதிப்புக்குரியது அல்ல என்பதனால் – மூன்று முக்கிய விஷயங்களை நிறைவேற்றாமல் பதவியிலிருந்து விலகினேன். நான் இன்னும் இரண்டு ஆண்டுகள் ஆட்சியில் இருந்திருக்க முடியும். 

இருந்தபோதிலும், சிங்களவர்களும் குறிப்பாக சிங்கள பௌத்தர்களும் பல்வேறு வெளிநாட்டு மற்றும் உள்ளூர் கட்சிகளால் சாதாரணமாக எடுத்துக் கொள்ளப்படுவதும், புறக்கணிக்கப்படுவதும், ஓரங்கட்டப்படுவதும், தாழ்த்தப்படுவதும், பந்தாடப்படுவதும், பொருளாதாரத்தின் சீரழிவு மற்றும் பாரிய கடன்சுமை போன்ற விடயங்கள் என்னை அதிகாரத்திற்குத் தெரிவு செய்தன.

சட்டம் ஒழுங்கு, தேசிய பாதுகாப்பு மற்றும் உளவுத்துறை ஆகிய துறைகள் நாடு முழு தோல்வியடைந்துள்ளது. தீர்க்கப்படாத இப்பிரச்சினைகளை எதிர்காலத்தில் வேறு ஒரு தலைவரால் கையாள வேண்டியிருக்கும். இந்த தலைவரை விரைவில் இலங்கை கண்டுபிடிக்கும் என்பது எனது தீவிர நம்பிக்கை’ என தெரிவிக்கப்பட்டுள்ளது.