தலைப்புச் செய்திகள்

பணியில் இருந்தபோது, போதைப்பொருள் உட்கொண்டிருந்த பஸ் சாரதிகள் 08 பேர் கைது

பணியில் இருந்தபோது போதைப்பொருள் உட்கொண்டிருந்ததாகக் கூறப்படும் பஸ் சாரதிகள் எட்டுப்பேர் மற்றும் ஒரு நடத்துநர் களுத்துறையில் கைது செய்யப்பட்டுள்ளதாக பொலிஸார் தெரிவித்துள்ளனர்.

களுத்துறை தெற்கு பொலிஸ் நிலைய அதிகாரிகள், தேசிய போக்குவரத்து வைத்திய நிறுவனத்துடன் இணைந்து நடத்திய கூட்டு நடவடிக்கையின்போது, நேற்று (19) இந்தக் கைதுகள் மேற்கொள்ளப்பட்டன.

களுத்துறை தெற்கு பொலிஸ் பிரிவின் கீழ் இந்த நடவடிக்கை மேற்கொள்ளப்பட்டது. இதில், பணியில் இருக்கும்போது போதைப்பொருள் பயன்படுத்துவதைக் கண்டறியும் நோக்கில், பொதுப் போக்குவரத்து பஸ் சாரதிகள் மற்றும் நடத்துநர்களிடம் சோதனைகள் நடத்தப்பட்டன.

இந்த நடவடிக்கையின்போது, ​​சட்டவிரோத போதைப்பொருட்களின் தாக்கத்தில் பணிக்கு வந்ததாக சந்தேகிக்கப்படும் ஒன்பது நபர்களை அதிகாரிகள் கண்டறிந்து அவர்களைக் கைது செய்தனர்.

சந்தேக நபர்கள், 35 முதல் 57 வயதுக்குட்பட்டவர்கள் என்றும், அவர்கள் பயகல, யட்டியன, தொடங்கொட, தெபுவன, மீகஹதென்ன மற்றும் களுத்துறை தெற்கு ஆகிய பகுதிகளைச் சேர்ந்தவர்கள் என்றும் பொலிஸார் தெரிவித்தனர்.

களுத்துறை தெற்கு பொலிஸ் பிரிவினர் மேலதிக விசாரணைகளை மேற்கொண்டு வருகின்றனர்.