கொள்முதல் முடிவுகள் சரியான நேரத்திலும், சரியான முறையிலும் 2024 ஆம் ஆண்டில் எடுக்கப்படாததால், சில மருந்துகளுக்கு தற்போது பற்றாக்குறை ஏற்பட்டுள்ளது என்று சுகாதார அமைச்சர் நலிந்த ஜயதிஸ்ஸ தெரிவித்துள்ளார்.
நேற்று சனிக்கிழமை கொழும்பில் நடந்த ஒரு நிகழ்வில் உரையாற்றிய அமைச்சர் நலிந்த ஜயதிஸ்ஸ்; “இலங்கை ஒவ்வொரு ஆண்டும் நூற்றுக்கணக்கான மருந்துகளை இறக்குமதி செய்கிறது. ஆனால் 2025 ஆம் ஆண்டிற்கான மருந்துகளை வாங்குவதற்கான கேள்வி அறிவித்தல்கள், 2024 ஆம் ஆண்டின் முதல் ஐந்து மாதங்களில் 67 வகையான மருந்துகளுக்கு மட்டுமே மேற்கொள்ளப்பட்டன” என்றார்.
பல ஆண்டுகளாக நிறுத்தப்பட்டிருந்த 233 வகையான மருந்துகளை கொள்வனவு செய்வதற்கான கேள்வி அறிவிப்புகள் இப்போது விடுக்கப்பட்டுள்ளன என்றும் அவர் குறிப்பிட்டார்.
2025 ஆம் ஆண்டின் – முதல் ஐந்து மாதங்களில் அரச மருந்துக் கூட்டுத்தாபனம் 233 வகையான மருந்துகளுக்கான கொள்முதல் செயல்முறைகளை முடித்துள்ளதாகவும் சுகாதார அமைச்சர் தெரிவித்தார்.
பொது மருத்துவமனை அமைப்பில் பயன்படுத்தப்படும் மருந்துகளில் 65 சதவீதம் இறக்குமதி செய்யப்படுகின்றன என்றும், மருந்துகளை வழங்குவதற்கான செயல்முறை, ஆரம்ப கட்டத்திலிருந்து கொள்முதல் மற்றும் விநியோகம் வரை, சுமார் ஒன்பது மாதங்கள் எடுக்கும் என்றும், அது மிகவும் சிக்கலானது என்றும் விளக்கினார்.
“2026 ஆம் ஆண்டிற்கு, அரச மருந்துக் கூட்டுத்தாபனம் 450 வகையான மருந்துகளை வழங்க வேண்டும். இவற்றில், 435 மருந்துகளுக்கான கேள்வி அழைப்பு நடைமுறைகள் ஏற்கனவே தொடங்கப்பட்டுள்ளன. மேலும் 418 மருந்துகளுக்கான கொள்முதல் செயல்முறை ஏற்கனவே முடிக்கப்பட்டுள்ளது. அவற்றில் 325 மருந்துகள் இறுதி மதிப்பீட்டிற்கு அனுப்பப்பட்டுள்ளன. தற்போது, இலங்கையில் மருந்து விநியோக செயல்முறை திறமையாகவும் இடையூறு இல்லாமல் தொடர்வதை உறுதி செய்வதற்கு பல நடவடிக்கைகளை எடுத்துள்ளோம்” எனவும் அவர் தெரிவித்தார்.
“சமீபத்தில், மேற்கத்திய மருந்துகளின் உள்ளூர் உற்பத்தியாளர்கள் மற்றும் மருந்துகளை இறக்குமதி செய்யும் நிறுவனங்கள் ஆகிய இரண்டு தரப்பாருடனும் நாங்கள் நீண்ட கலந்துரையாடல்களை நடத்தினோம். தற்போதைய நிலைமையை அவர்களுக்கு விளக்கி, இலக்குகளை வழங்கினோம். குறிப்பிட்ட காலக்கெடுவிற்குள் அவர்கள் வழங்கக்கூடிய மற்றும் உற்பத்தி செய்யக்கூடிய மருந்துகளின் வகைகளை எங்களுக்குத் தெரிவிக்குமாறு கேட்டுக் கொண்டோம். இந்த இலக்குகளை அவர்களால் அடைய முடியாவிட்டால், மருந்துகளை இறக்குமதி செய்வதற்கு ஏற்பாடு செய்ய சுகாதார அமைச்சு நடவடிக்கை எடுக்க வேண்டும்” என்றும் அவர் கூறினார்.
இலங்கையில் தற்போது நிலவும் மருந்துப் பற்றாக்குறைக்கு – அரசாங்கம் வழங்கக்கூடிய சிறந்த தீர்வு இது என்று சுகாதார அமைச்சர் நலிந்த ஜெயதிஸ்ஸ சுட்டிக்காட்டினார். “இந்த நாட்டு மக்களுக்கு உயர்தர மருந்துகளின் தொடர்ச்சியான விநியோகத்தை உறுதி செய்வதே எங்கள் நோக்கம்” என்றும் அமைச்சர் நலிந்த குறிப்பிட்டார்.