சம்மாந்துறையில் பணியாற்றும் அரச உத்தியோத்தர் ஐஸ் போதைப் பொருளுடன் கைது

– பாறுக் ஷிஹான் –

ஐஸ் போதைப் பொருளுடன் அரச உத்தியோகத்தர் ஒருவரை கல்முனை விசேட அதிரடிப்படையினர் நேற்று (03) கைது செய்தனர்.

கல்முனை விசேட அதிரடிப்படையின் விசேட தேர்ச்சி பெற்ற புலனாய்வு பிரிவின் தகவலுக்கமைய – நீண்ட நாட்களாக சூட்சுமமான முறையில் ஐஸ் போதைப்பொருளை மோட்டார் சைக்கிளில் விநியோகம் செய்து வந்த குறித்த சந்தேக நபரை சாய்ந்தமருது பிரதான வீதியில் வைத்து விசேட அதிரடிப்படையினர் கைது செய்தனர்.

குறித்த நபர் சம்மாந்துறை பகுதியில் உள்ள கல்வி திணைக்களத்தில் பணிபுரிபவராவார். இவர் ஐஸ் போதைப் பொருளை சாய்ந்தமருது உட்பட கல்முனைக்கு நீண்ட காலமாக விநியோகித்து வந்த நிலையில் கைது செய்யப்பட்டுள்ளார்.

43 வயது மதிக்கத்தக்க குறித்த சந்தேக நபர் 25 கிராம் ஐஸ் போதைப்பொருளினை பைகளில் உறையிட்டு – மிக சூட்சுமமாக கடத்தி வந்த போது, மோட்டார் சைக்கிளுடன் கல்முனை விசேட அதிரடிப்படையினர் கைது செய்தனர்.

மேலதிக சட்ட நடவடிக்கைக்காக சாய்ந்தமருது பொலிஸ் நிலையத்திற்கு சந்தேக நபர் மற்றும் சான்றுப்பொருட்களை கல்முனை விசேட அதிரடிப்படையினர் ஒப்படைத்தனர்.