தலைப்புச் செய்திகள்

O/L மற்றும் A/L பரீட்சைகளுக்குத் தயாராகும் மாணவர்கள், பாடசாலை செல்வது கட்டாயம்: அக்கரைப்பற்றில் பிரதமர் ஹரினி

க.பொ.த சாதாரண தரம் (O/L) மற்றும் உயர்தரப் (A/L) பரீட்சைகளுக்குத் தயாராகும் மாணவர்கள் பாடசாலைக்குச் செல்வது கட்டாயமாகும் பிரதமர் மற்றும் கல்வி அமைச்சர் கலாநிதி ஹரிணி அமரசூரிய வலியுறுத்தியுள்ளார். எனவே, மாணவர்கள் தொடர்ந்து பாடசாலைக்குச் செல்வதை உறுதிப்படுத்துமாறு பெற்றோர்களை அவர் கேட்டுக்கொண்டார்.

அக்கரைப்பற்று முஸ்லிம் தேசிய பாடசாலையின் 80-வது ஆண்டு விழாவில் இன்று (15) உரையாற்றிய பிரதமர், ஒவ்வொரு பிள்ளையும் 13 ஆண்டுகள் கல்வியைப் பெற வேண்டும் என்றார்.

மாணவர்கள் சாதாரண தரம் மற்றும் உயர்தர வகுப்புகளை அடையும் போது, ​​அவர்களில் சிலர் தொடர்ந்து பாடசாலைக்குச் செல்வதை நிறுத்திவிடுவது குறித்து அவர் தனது கவலையை வெளிப்படுத்தினார்.

“ஒவ்வொரு பிள்ளையும் பாடசாலைக்குச் செல்ல வேண்டும். ஒவ்வொரு பிள்ளையும் 13 ஆண்டுகள் கல்வியைப் பெற வேண்டும். தங்கள் பிள்ளைகள் பாடசாலைக்குச் செல்வதை உறுதிப்படுத்துமாறு – நான் குறிப்பாகப் பெற்றோர்களைக் கேட்டுக்கொள்கிறேன்” என்று அவர் கூறினார்.

கல்வியின் தரத்தை மேம்படுத்துவதில் அரசாங்கம் கொண்டுள்ள அர்ப்பணிப்பைச் சுட்டிக்காட்டிய பிரதமர், 2027 வரவு – செலவுத் திட்டத்தில் கல்விக்காக 749 பில்லியன் ரூபாய் ஒதுக்கப்பட்டுள்ளதாகவும், இதில் பாடசாலைக் கல்விக்காக மட்டும் 562.4 பில்லியன் ரூபாய் ஒதுக்கப்பட்டுள்ளது என்றும் அவர் மேலும் தெரிவித்தார்.

இலங்கையின் வரலாற்றில் கல்விக்காக ஒதுக்கப்பட்ட மிக உயர்ந்த தொகை இதுவாகும் என்று அவர் சுட்டிக்காட்டினார்.

தற்போது முன்னெடுக்கப்பட்டு வரும் கல்விச் சீர்திருத்தங்கள் குறித்துக் குறிப்பிட்ட கலாநிதி ஹரினி அமரசூரிய, 2026-ஆம் ஆண்டு முதலாம் தரத்திற்கு அறிமுகப்படுத்தப்படும் புதிய பாடத்திட்டம், 2027-ஆம் ஆண்டில் இரண்டாம் மற்றும் ஆறாம் தரங்களுக்கும் விரிவுபடுத்தப்படும் என்றார்.

பாடசாலைக் கட்டமைப்பிற்குள் மாணவர்களுக்குத் தொழில்நுட்பம், தொழிற்கல்வி மற்றும் நடைமுறை வாழ்க்கைத் திறன்களைப் பெற்றுக்கொள்வதற்கான வாய்ப்புகளை அதிகரிப்பதே இந்தச் சீர்திருத்தங்களின் நோக்கம் என்று அவர் விளக்கினார்.

கல்வி என்பது பரீட்சைகளில் சித்தியடைவதைத் தாண்டி, மாணவர்களிடையே தலைமைத்துவம், குழுப்பணி, நேர்மறையான மனப்பாங்குகள் மற்றும் வேகமாக மாறிவரும் உலகில் வெற்றி பெறுவதற்குத் தேவையான திறன்களை வளர்க்க உதவும் வகையில் அமைய வேண்டும் என்று பிரதமர் வலியுறுத்தினார்.

மேலும், இலங்கையில் உள்ள ஒவ்வொரு பிள்ளைக்கும், அவர்களின் பின்னணி எதுவாக இருந்தாலும், தரமான கல்வியைப் பெறுவதற்கு உரிமை உண்டு என்றும், சமமான கல்வி வாய்ப்புகளை உறுதிப்படுத்துவது அரசாங்கத்தின் பொறுப்பாகும் என்றும் அவர் வலியுறுத்தினார்.