
முஸ்லிம் சமய, கலாசார திணைக்களம் மற்றும் ஹஜ் குழுவுக்கு எதிராக, லஞ்சம் – ஊழல் குற்றச்சாட்டுகளை விசாரிக்கும் ஆணைக்குழுவில் ஹஜ் பயண ஏற்பாட்டாளர்கள் குழுவொன்று முறைப்பாடு செய்துள்ளது.
ஏற்பாட்டாளர்களுக்குச் சேர வேண்டிய ரூ. 11 கோடிக்கும் அதிகமான தொகை, முறையான காரணம் ஏதுமின்றி – ஒரு வருடத்திற்கும் மேலாக நிறுத்தி வைக்கப்பட்டுள்ளதாக அவர்கள் தமது முறைப்பாட்டில் தெரிவித்துள்ளனர்.
2025 ஆம் ஆண்டு ஹஜ் யாத்திரையில் சுமார் 3,500 யாத்ரீகர்கள் பங்கேற்றனர். இதில், விசேட கூடார வசதிகளுக்காக ஒவ்வொரு யாத்ரீகரிடமும் கூடுதலாக 362 சவூதி ரியால்கள் கூடுதல் கட்டணமாக வசூலிக்கப்பட்டதாக முறைப்பாட்டாளர்கள் கூறியுள்ளனர்.

கட்டணம் செலுத்தவில்லையெனில் விசாக்கள் வழங்கப்படாது என்று திணைக்களம் தெரிவித்த பின்னரே, மேலதிக கட்டணத்தைச் செலுத்த தாங்கள் நிர்பந்திக்கப்பட்டதாக ஏற்பாட்டாளர்கள் குற்றம் சாட்டியுள்ளனர். இருப்பினும், யாத்திரை சுமுகமாக நடைபெறுவதை உறுதி செய்வதற்காகப் பணம் செலுத்தப்பட்ட போதிலும், வாக்குறுதியளிக்கப்பட்ட வசதிகள் வழங்கப்படவில்லை என்று அவர்கள் முறைப்பாட்டில் கூறியுள்ளனர்.
மேலும், ஹஜ் குழுவின் அறிவுறுத்தல்களின்படி – பணம் திரும்ப வழங்கப்படும் என்று திணைக்களம் பலமுறை உறுதியளித்த போதிலும், இன்றுவரை எந்தப் பணமும் வழங்கப்படவில்லை என்றும் முறைப்பாட்டாளர்கள் தெரிவித்துள்ளனர்.
ஹஜ் பயண ஏற்பாட்டாளர்களுக்காக ஒதுக்கப்பட்ட நிதியை, திணைக்களம் முறைகேடாகப் பயன்படுத்தியதாக ஏற்பாட்டாளர்கள் குற்றம் சாட்டியுள்ளனர். மேலும், ஒரு தீர்வைக் கோரி மீண்டும் மீண்டும் விடுத்த வேண்டுகோள்களுக்குப் பதில் அளிக்கப்படாததால், இந்த விவகாரத்தை லஞ்ச ஆணைக்குழுவிடம் கொண்டு செல்ல வேண்டிய கட்டாயம் ஏற்பட்டதாகவும் அவர்கள் சுட்டிக்காட்டியுள்ளனர்.
மேலும், இந்தப் பிரச்சினையை உடனடியாகத் தீர்க்கத் தவறினால், எதிர்காலத்தில் ஹஜ் சேவைகளைத் தொடர்ந்து நடத்துவதற்கான தங்களின் திறன் கடுமையாகப் பாதிக்கப்படக்கூடும் என்றும் அவர்கள் எச்சரித்துள்ளனர்.


