வென்றார் பசீர்; நீண்ட போராட்டத்துக்குப் பின்னர் கிடைத்தது, அஷ்ரப் மரண அறிக்கை

அஷ்ரஃப்பின் மரண அறிக்கையினை பெற்றுக் கொடுப்பது தொடர்பாக 27 ஆம் திகதியன்று நடந்த ஆணைக்குழுவின் அமர்விலே, சுவடிகள் கூடத் திணைக்களத்தின் பணிப்பாளர் நாயகத்திடம் இவ்வறிக்கையை – அவர்களின் உத்தியோகபூர்வ இணையத்தில் வெளியிடுமாறு, தகவல் அறியும் ஆணைக்குழு கூறியிருந்தது. ஆயினும், இவ்வறிக்கை சுவடிக் கூட திணைக்களத்திடமிருந்து பெறப்பட்டதில்லை என்பதனால், அவர்களின் இணையத்தில் வெளியிட முடியாது எனக் கூறி, கூடத்தின் பணிப்பாளர் அவ் வேண்டுகோளை நிராகரித்தார்.

இந்த நிலையில் மேற்படி அறிக்கையினை ஆராயுமாறு – தனது சட்டத்தரணிகளிடம் அதனை ஒப்படைத்துள்ளதாகவும், அவர்களின் ஆலோசனைக்கமைய அடுத்தகட்ட நடவடிக்கைகளை மேற்கொள்ளவுள்ளதாகவும்  பசீர் சேகுதாவூத் தெரிவித்துள்ளார்.

அஷ்ரப்பின் மரணம் தொடர்பான மேற்படி அறிக்கையினை தனக்கு வழங்குமாறு தகவல் அறியும் உரிமை சட்டத்தின் பிரகாரம், ஜனாதிபதி செயலகத்திடம்  பசீர் சேகுதாவூத் கோரியிருந்த போதும், அந்த அறிக்கை தம்மிடம் இல்லை என்று, ஜனாதிபதி செயலகத்தினர் தெரிவித்திருந்தனர்.

இதனையடுத்து, தகவல் அறியும் ஆணைக்குழுவுக்கு பசீர் மேன்முறையீடு செய்தார். அதன் பின்னர், சுவடிகள் கூடத் திணைக்களத்திடம் அந்த  அறிக்கை கோரப்பட்டது. ஆனால், அவர்களிடமும் அந்த அறிக்கை முழுமையாக இல்லை எனக் கூறப்பட்டது.

இதனையடுத்தே, குற்றப் புலனாய்வு திணைக்களத்திடமிருந்து அந்த அறிக்கை பெறப்பட்டு, விண்ணப்பதாரருக்கு வழங்கப்பட்டுள்ளமை குறிப்பிடத்தக்கது.