கல்முனை – சம்மாந்துறை ஒருங்கிணைந்த பாரிய நகரம்; துபாய், பஹ்ரைன் போல் திகழும்: ஹக்கீம் தலைமையிலான கூட்டத்தில் தெரிவிப்பு

இந்த மீளாய்வுக் கூட்டத்தின் ஆரம்பத்தில் மொரட்டுவை பல்கலைக்கழகத்தைச் சேர்ந்த பேராசிரியர் பீ.கே.எஸ். மஹாநாம மற்றும் கலாநிதி ரீ.எம்.என். விஜயரத்தின ஆகியோர் வரை படங்களை காட்சிப்படுத்தி, உத்தேச கல்முனை சம்மாந்துறை பாரிய நகர அபிவிருத்தியின் போது மேற்கொள்ளப்படவுள்ள நவீனமயமாக்கல் செயல்பாடுகளைப் பற்றி விபரித்துக் கூறினர். துபாய், பஹ்ரைன் போன்ற நாடுகளில் காணப்படும் நகரங்களை ஒத்ததான ஓரு பெருநகரமாக இது திகழக்கூடிய வாய்ப்புள்ளதாகவும் அவர்கள் சுட்டிக்காட்டினர்.

2030ஆம் ஆண்டுக்கும் 2050ஆம் ஆண்டு இடைப்பட்ட காலத்தில் 05 இலட்சம் சனத்தொகையைக் கொண்ட பிரதேசமாக இந்தப் பகுதி மாற்றமடையுமென்ற மதிப்பீட்டில் பல்மாடிக்கட்டிடத் தொகுதிகள் பலவற்றையும், விஸ்தரிக்கப்பட்ட பாதைகளையும், ஏனைய நகரங்களை இணைக்கக்கூடிய புகையிரத மற்றும் போக்குவரத்து வசதிகளைக் கொண்டதாகவும் இப்பிரதேசம் திகழுமென அமைச்சர் ஹக்கீம் நம்பிக்கை தெரிவித்தார்.

இந்த பாரிய நகர அபிவிருத்தி மேற்கொள்ளப்படும் போது உலக சந்தை வாய்ப்புகளுக்களுக்கான ஒரு வர்த்தக மையமாகவும், வெளிநாட்டு, உள்நாட்டு முதலீட்டாளர்களை ஈர்க்கக்கூடிய பிரதான வர்த்தக மையமாகவும் கிழக்கு மாகாணத்தை இந்தப் பிரதேசம் வளர்ச்சியடையுமெனவும் அவர் மேலும் கூறினார். திருகோணமலை மற்றும் அம்பாந்தோட்டை வர்த்த மையங்களோடு இணைப்பை ஏற்படுத்துவதற்கும் முயற்சி மேற்கொள்ளப்படுமென்றும் அமைச்சர் ஹக்கீம் கருத்துத் தெரிவித்தார்.