..நாடு முழுவதும் உள்ள மேல் நீதிமன்றங்களில் 4,000க்கும் மேற்பட்ட சிறுவர் துஷ்பிரயோக வழக்குகள் தாக்கல் செய்யப்பட்டுள்ளதாக தேசிய சிறுவர் பாதுகாப்பு அதிகாரசபை தெரிவித்துள்ளது.
1998ஆம் ஆண்டின் 28ஆம் இலக்க குற்றவியல் நடைமுறைச் சட்டம் (திருத்தம்) சட்டத்தின் விதிகளின் கீழ், இந்த வழக்குகள் தாக்கல் செய்யப்பட்டுள்ளன என்று, அதிகாரசபை குறிப்பிட்டுள்ளது.
தற்போது, சிறுவர் துஷ்பிரயோகம் தொடர்பான மொத்தம் 4,289 வழக்குகள் மேல் நீதிமன்றங்களில் நிலுவையில் உள்ளன என்று அதிகாரசபை மேலும் குறிப்பிட்டுள்ளது. இவற்றில், 1,683 வழக்குகள் விரைவில் விசாரிக்கப்பட உள்ளன என அந்த சபை கூறியுள்ளது.
ஆபாச வெளியீடுகள், கொள்முதல் மற்றும் சுரண்டல், பாலியல் நடவடிக்கைகளுக்கு சிறுவர்களைப் பணியமர்த்தல், கொடுமைப்படுத்துதல், கற்பழிப்பு மற்றும் கடுமையான பாலியல் துஷ்பிரயோகம் உள்ளிட்ட சிறுவர்கள் சம்பந்தப்பட்ட பல்வேறு குற்றங்கள் தொடர்பாக மேல் நீதிமன்றங்களில் சட்டமா அதிபர் குற்றப்பத்திரிகைகளை தாக்கல் செய்துள்ளார்.
சிறுவர்களுக்கு எதிராக மேற்கொள்ளப்படும் கடுமையான குற்றங்கள் தொடர்பாக, சட்ட நடவடிக்கை கடுமையாக பின்பற்றப்பட்டு வருவதாகவும், நாடு முழுவதும் நீதிமன்ற நடவடிக்கைகள் தொடர்ந்து நடைபெற்று வருவதாகவும் தேசிய சிறுவர் பாதுகாப்பு அதிகார சபை மேலும் தெரிவித்துள்ளது.