தனியார் துறை ஊழியர்களின் குறைந்தபட்ச சம்பளம் – ஜனவரி 01 முதல் 3,000 ரூபாயினால் அதிகரிக்கப்பட்டுள்ளது.
அதன்படி குறைந்தபட்ச ஊதியம் ரூ. 27,000 லிருந்து ரூ. 30,000 ஆக அதிகரிக்கப்பட்டுள்ளதாக தொழில் ஆணையாளர் நாயகம் எச். எம். டி. கே. நதீகா வட்டலியத்த தெரிவித்துள்ளார்.
2025 ஆம் ஆண்டு 11ஆம் இலக்க தேசிய குறைந்தபட்ச ஊழியர் சம்பள (திருத்தம்) சட்ட விதிகளின்படி, இந்த சம்பளம் அதிகரிக்கப்பட்டுள்ளது.
சட்டத்தை முறையாக அமல்படுத்தும்போது, உடனடி முதலாளி மற்றும் முதன்மை முதலாளி உட்பட ஒவ்வொரு முதலாளியும், ஒரு இடைத்தரகர் அல்லது ஒப்பந்ததாரர் மூலம், ஒரு தொழில் அல்லது சேவையில் ஈடுபட்டுள்ள எந்தவொரு ஊழியருக்கும் சட்டத்தின் விதிகளால் கட்டுப்படுகிறார்கள் என்று தொழில் ஆணையாளர் நாயகம் குறிப்பிட்டுள்ளார்.
மேலும், சட்டத்தின் பிரிவு 4 இன் படி, மார்ச் 31, 2025 அன்று – ஒரு ஊழியர் பெற்ற வரவு – செலவுத் திட்ட நிவாரண கொடுப்பனவுகளைத் தவிர, வேறு எந்த கொடுப்பனவும் குறைந்தபட்ச ஊதியத்தை ஈடுசெய்ய அல்லது மாற்றாகப் பயன்படுத்தப்படக்கூடாது.
சம்பள உயர்வுக்கு ஏற்ப, ஊழியர் சேமலாப நிதி (EPF), ஊழியர் நம்பிக்கை நிதி (ETF), மேலதிக நேரக் கொடுப்பனவுகள், பணிக்கொடை, மகப்பேறு சலுகைகள் மற்றும் விடுப்பு கொடுப்பனவுகள் உள்ளிட்ட அனைத்து சட்டப்பூர்வ கொடுப்பனவுகளுக்கும் இதைப் பயன்படுத்துவதற்கான பொறுப்பு முதலாளிகளிடம் உள்ளது என்று ஆணையாளர் நாயகம் குறிப்பிட்டுள்ளார்.
எந்தவொரு முதலாளியும் தேவையான கொடுப்பனவுகளை முறையாகச் செய்யத் தவறினால், முறைப்பாடுகளை தொழிலாளர் திணைக்களத்தின் முறைப்பாட்டு முகாமை அமைப்பு மூலம் cms.labourdept.gov.lk வழியாக சமர்ப்பிக்கலாம் அல்லது அருகிலுள்ள தொழிலாளர் அலுவலகத்திற்கு எழுத்துபூர்வமாக சமர்ப்பிக்கலாம் என்று அவர் மேலும் தெரிவித்துள்ளார்.