ஹம்பாந்தோட்டையில் உள்ள வீடொன்றில் இயங்கி வந்த, ஐஸ் போதைப்பொருள் உற்பத்தி தொழிற்சாலையை களுத்துறை குற்றப்பிரிவினர் கண்டுபிடித்துள்ளனர்.
ஐஸ் உற்பத்திக்கு பயன்படுத்தப்பட்டதாக சந்தேகிக்கப்படும் உபகரணங்கள் மற்றும் ரசாயனங்களையும், போதைப்பொருட்களை கொண்டு செல்ல பயன்படுத்தப்பட்டதாக நம்பப்படும் இடத்தில் நிறுத்தப்பட்டிருந்த ஒரு வாகனத்தையும், அதிகாரிகள் கைப்பற்றினர்.
மேலும், ஐஸ் தயாரிப்புக்குப் பயன்படுத்தப்பட்டதாக சந்தேகிக்கப்படும் மொத்தம் 52 லிட்டர் ரசாயனங்கள் அடங்கிய 14 கேன்களையும், போதைப்பொருள் உற்பத்தி செயல்முறைக்கு பயன்படுத்தியதாக நம்பப்படும் பல்வேறு உபகரணங்களையும் அதிகாரிகள் கண்டுபிடித்தனர்.
இந்த சம்பவம் தொடர்பாக வெல்லவாயவைச் சேர்ந்த 20 வயது நபர் கைது செய்யப்பட்டுள்ளார். அவர் சமீபத்தில் கைது செய்யப்பட்ட பாதாள உலகக் குழு தலைவர் சுரங்காவின் நண்பராகவும் அடையாளம் காணப்பட்டுள்ளார்.
ஏற்கனவே – நுவரெலியா, மித்தெனிய, நெட்டோலிபிட்டிய மற்றும் கந்தானை ஆகிய இடங்களில் இதுபோன்ற ஐஸ் உற்பத்தி தொழிற்சாலைகளையும், அதற்காக பயன்படுத்தும் ரசாயனங்களையும் பொலிஸ் கண்டுபிடித்துள்ளனர்.