ஐக்கிய மக்கள் சக்தி, மொட்டு தரப்பு எம்.பிகள், தரகுப் பணத்துக்காக மதுபான கடைகளைப் பெற்றுக் கொடுத்துள்ளமை அம்பலம்
ஐக்கிய மக்கள் சக்தி மற்றும் ஆளும் ஸ்ரீலங்கா பொதுஜன பெரமுன ஆகிய இரு கட்சிகளையும் சேர்ந்த சில பாராளுமன்ற உறுப்பினர்கள், தரகுப் பணத்துக்காக அரசாங்கத்திடம் இருந்து மதுபான கடைகளின் உரிமங்களை – தங்கள் கூட்டாளிகளுக்கு பெற்றுக் கொடுத்துள்ளதாக ‘டெய்லி மிரர்’ செய்தி வெளியிட்டுள்ளது.
மதுபானக் கடைகளை அமைக்கும் திட்டம் குறித்தும், உரிமம் பெற உதவியவர்கள் குறித்தும் கண்டி போன்ற சில மாவட்டங்களின் மதத் தலைவர்கள் – விசாரித்ததையடுத்து இந்த விவகாரம் வெளிச்சத்துக்கு வந்துள்ளது.
தமக்கு மதுபான விற்பனை உரிமங்களைப் பெறுவதற்கு உதவிய – ஐக்கிய மக்கள் சக்தி நாடாளுமன்ற உறுப்பினர்கள் சிலரின் பெயர்களை, வணிகர்கள் கூறியுள்ளனர்.
இந்த விடயம் ஐக்கிய மக்கள் சக்தி தலைவர் சஜித் பிரேமதாசவின் கவனத்துக்குக் கொண்டு வரப்பட்டுள்ள நிலையில், இது தொடர்பில் பரிசீலிப்பதாக அவர் உறுதியளித்துள்ளதாக தெரிவிக்கப்படுகின்றது.
அரசியல் ஆதரவின் கீழ் – மதுக்கடைகளை திறப்பதற்கான உரிமங்கள் வழங்கப்படுவது அனைவரும் அறிந்ததே. மேலும், வெவ்வேறு முகாம்களைச் சேர்ந்த அரசியல்வாதிகள் இத்தகைய கடைகளை நேரடியாகவோ அல்லது தங்கள் பினாமிகள் மூலமாகவோ வைத்திருக்கிறார்கள்.
இதற்கிடையில், கட்சித் தலைமையின் அனுமதியின்றி அந்தந்த தொகுதிகளில் அபிவிருத்திப் பணிகளை மேற்கொள்வதற்காக – அரசாங்கத்திடம் இருந்து நிதி ஒதுக்கீட்டைப் பெற்ற, ஐக்கிய மக்கள் சக்தி நாடாளுமன்ற உறுப்பினர்களிடம் கட்சியின் பொதுச் செயலாளர் ரஞ்சித் மத்தும பண்டார கேள்வி எழுப்ப உள்ளதாகத் தெரிவிக்கப்படுகிறது.
