அமைச்சுக் கூட்டத்தின் இடையில் புகுந்த ஞானசார தேரர்; கல்முனை விவகாரம் இழுத்தடிக்கப்படுவதாக விசனம்
கல்முனை உப பிரதேச செயலக விவகாரம் தொடர்பில் நேற்று வியாழக்கிழமை காலை உள் நாட்டலுவல்கள் மாகாண சபை அமைச்சில் கூட்டமொன்று நடைபெற்றுக் கொண்டிருந்த போது, ஞானசார தேரர் பிரவேசித்தமையினால் அங்கு பெரும் பரபரப்பு ஏற்பட்டதாகத் தெரிவிக்கப்படுகிறது.
அமைச்சர் வஜிர அபேவர்த்தனவின் தலைமையில் இந்தக் கூட்டம் நடைபெற்றது.
மேற்படி கூட்டத்தில் அம்பாறை மாவட்ட அரசாங்க அதிபர் மற்றும் பிரதேச செயலாளர்கள் மற்றும் அமைச்சின் செயலாளர்கள் கலந்து கொண்டனர்.
இந்த கூட்டம் நடைபெற்றுக் கொண்டிருந்த போது இடைநடுவில் உட்புகுந்த கலகொட அத்தேஞானசார தேரர்; கல்முனை உப பிரதேச செயலகத்தினை தரமுயர்த்துவதில் காண்பிக்கப்படும் காலதாமதம் தொடர்பில் கடும் அதிருப்தி தெரிவித்துள்ளார்.
“இந்த விடயத்தில் இழுத்தடிப்பு மேற்கொள்ளப்படுகின்றது. அம்பாறை மாவட்ட அரசாங்க அதிபர் இதில் உரிய நடவடிக்கை எடுக்கவில்லை.
கிழக்கில் பல்வேறு கிராமங்களுக்கு அராபிய பெயர்கள் வைக்கப்பட்டுள்ன. இஸ்லாமாபாத் என்று ஒரு கிராமம் உருவாக்கப்பட்டுள்ளது. இத்தகைய செயற்பாடுகளுக்கு ஏன் அனுமதிக்கின்றீர்கள்” என்றும் ஞானசார தேரர் இதன்போது கேள்ளியெழுப்பினார்.
ஞானசார தேரர் கூறிய விடயங்களைச் செவியுள்ள அமைச்சர் வஜிர அபேவர்த்தன, அம்பாறை மாவட்ட செயலாளர் உட்பட அதிகாரிகளின் செயற்பாடுகள் தொடர்பில் அதிருப்தி வெளியிட்டதாகத் தெரிவிக்கப்படுகிறது.
