நான் உங்கள் மனதைப் புண்படுத்தி விட்டேன் என்று கூறி, ஹக்கீம் மன்னிப்புக் கோரினார்: நடந்த கதை சொல்கிறார் ஹசனலி
முஸ்லிம் காங்கிரசின் பேராளர் மாநாட்டுத் தீர்மானத்தில், கரையோர மாவட்டக் கோரிக்கை கை விடப்பட்டுள்ளமை குறித்து, அந்தக் கட்சியின் மூத்த தியாகிகளில் ஒருவரான எம்.ரி. ஹசனலி வருத்தமும், வேதனையும் தெரிவித்துள்ளார்.
கரையோரக் கோரிக்கையினை ஏனைய கட்சிகளுடனான புரிந்துணர்வு ஒப்பந்தங்களின் போது, தான் வலியுறுத்தி வந்ததாகவும், இப்போது கட்சியில் தான் இல்லாத வெறுமையை உணர்வதாகவும் அவர் கூறினார்.
இது தொடர்பில் அவர் மேலும் தெரிவித்கையில்;
“கடந்த 11ஆம் திகதி இரவு நடைபெற்ற ஸ்ரீலங்கா முஸ்லிம் காங்கிரஸின் கட்டாய உயர்பீட கூட்டத்திலிருந்து நான் வெளியேறியதும் கட்சியின் தலைவர் அமைச்சர் ரவூப் ஹக்கீம் என்னைப் பின்தொடர்ந்து என் வீட்டுக்கு வந்து ‘என்னை மன்னித்து விடுங்கள். பல சந்தர்ப்பங்களில் உங்கள் மனதை நான் புண்படுத்தி விட்டேன்’ என்றார். அரை மணித்தியாலம் அவரது முகத்தைப் பார்க்காமலே இருந்தேன்.
பின்பு ‘லீடர் நீங்கள் திரும்புங்கள். நான் ஓய்வாக இருக்க விரும்புகிறேன்’ என அவரை அனுப்பி வைத்தேன். என்றார்.
கடந்த 11ஆம் திகதி தாருஸ்ஸலாமில் நடைபெற்ற ஸ்ரீலங்கா முஸ்லிம் காங்கிரஸின் அவசர கட்டாய உயர்பீடக் கூட்டத்தின் போது கட்சியின் செயலாளராக மன்சூர் ஏ.காதர் நியமிக்கப்பட்டதையடுத்து இதுவரை காலம் செயலாளர் நாயகமாகக் கடமையாற்றிய எம்.ரி. ஹசன் அலி பதவியிழந்தார்.
இதுதொடர்பில் ஹசன் அலியை ஊடகமொன்று தொடர்பு கொண்டபோதே அவர் இவ்வாறு கூறினார்.
அவர் தொடர்ந்தும் கருத்து தெரிவிக்கையில்; “கண்டி பொல்கொல்லையில் நடைபெற்ற பேராளர் மாநாட்டின் போது எனது செயலாளர் பதவிக்குரிய அதிகாரங்கள் பறிக்கப்பட்டு மற்றுமோர் செயலாளர் நியமிக்கப்பட்டார்.
இந்நிலையில் நான் சகல அதிகாரங்களையும் கொண்ட செயலாளர் பதவியே வேண்டும் என்ற நிலைப்பாட்டில் இருந்தேன். அதையே கேட்டேன். செயலாளர் பதவியுடன் தேசியப் பட்டியலில் உறுப்பினர் பதவியையும் தருவதாக பல தடவைகள் வாக்குறுதி வழங்கிய கட்சியின் தலைவர் என்னை ஏமாற்றிவிட்டார்.
கடந்த பேராளர் மாநாட்டின் நியமனங்களுடன் எனது 30 வருட அரசியல் வாழ்க்கைக்கு முடிவுகட்டப்பட்டுள்ளது. தவிசாளர் பதவியை ஏற்றுக்கொள்ளுமாறு தலைவர் மற்றும் உயர்பீட உறுப்பினர்களால் என்னிடம் வேண்டுகோள் விடுக்கப்பட்டது. வினயமாகக் கேட்கப்பட்டது. ‘ஒருவரிடமிருந்து பறித்தெடுத்து தரும் பதவியை ஏற்றுக்கொள்ளும் வழிகெட்ட ஆள் நான் இல்லை எனக்கென்று தனித்துவம் உள்ளது. எனது தனித்துவத்தை எவருக்கும் அடகு வைக்க மாட்டேன். தவிசாளர் பதவியை கடைசிவரை ஏற்றுக்கொள்ள மாட்டேன்’ என்றேன்.
“செயலாளர் பதவியை வகிப்பவர் தேர்தலில் போட்டியிட முடியாது என யாப்பிலும் மாற்றம் கொண்டுவரப்பட்டுள்ளது. தலைவரே உங்கள் பிரச்சினை நான் தானே? எனக்காகத்தானே இதெல்லாம். நானே கூறுகிறேன். செயலாளர் பதவியை ஒருவருக்கே கொடுங்கள். ஒரு கட்சியில் தலைவர் மற்றும் செயலாளர் பதவிகளே முக்கியமானவை. இவற்றை மலினப்படுத்த வேண்டாம் என்று உச்சபீட கூட்டத்தில் தலைவரிடம் தெரிவித்தேன்.
12ஆம் திகதி நடைபெற்ற பேராளர் மாநாட்டுக்கு எனக்கு அழைப்பிதழ் தரவில்லை. தபாலில் அனுப்பி வைக்கப்பட்டுள்ளதாகக் கூறினார்கள். ஆனால் எனக்குத் தபாலில் அழைப்பிதழ் கிடைக்கவில்லை.
எனது செயலாளர் பதவி விவகாரம் ஒன்றரை வருட காலமாக தேசியப் பட்டியல் விவகாரத்துடன் தொடர்புபடுத்தி இழுத்தடிக்கப்பட்டு வந்தது. இப்போது தலைவர் எனது விவகாரத்திக்கு முடிவு கண்டு விட்டார்.
பேராளர் மாநாட்டுக்கான அழைப்பிதழ்கள் எழுதுவது தொடர்பான வேலைகள் கட்சியின் தலைமைக் காரியாலயத்திலே நடைபெறுவது வழக்கம். ஆனால் இம்முறை அனைத்துப் பணிகளும் தலைவரின் அமைச்சு காரியாலயத்திலே இடம்பெற்றுள்ளன.
பேராளர் மாநாட்டில் நிறைவேற்றப்பட்டுள்ள தீர்மானங்கள் பற்றி எனக்கு அறியக்கிடைத்தது. அந்தத் தீர்மானங்களில் 30 வருட காலமாக இருந்து வந்த கரையோர மாவட்டக் கோரிக்கை இல்லாமற் செய்யப்பட்டுள்ளது. மறைந்த தலைவரின் அபிலாஷையாக இது இருந்தது.
இந்தக் கோரிக்கையை நான் ஏனைய கட்சிகளுடனான புரிந்துணர்வு ஒப்பந்தங்களில் வலியுறுத்தி வந்திருக்கிறேன். கட்சியில் நான் இல்லாத வெறுமையை இன்று உணர்கிறேன்.
சமூகத்தையும் கட்சியையும் அல்லாஹ்தான் பாதுகாக்க வேண்டும் என்று துஆ கேட்கிறேன்” என்றார்.
