எமது முடிவுகளை உங்களுக்கு அறிவிக்கத் தேவையில்லை : ஜனாதிபதிக்கு, லஞ்ச ஊழல் ஆணைக்குழு கடிதம்
லஞ்ச ஊழல் ஆணைக்குழு முன்னெடுக்கும் விசாரணைகளின் முடிவுகளை ஜனாதிபதிக்கு அறிவித்து – ஆலோசனையோ ஏனைய தீர்மானங்களையோ பெற்றுக்கொள்ள வேண்டும் என்ற சட்ட ரீதியிலான கடப்பாடு தமக்கு கிடையாது என, அந்த ஆணைக் குழுவிடமிருந்து ஜனாதிபதிக்கு கடிதம் ஒன்று அனுப்பப்பட்டுள்ளதாக நம்பகரமாக தெரியவருகின்றது.
நேற்று வெள்ளிக்கிழமை இந்த கடிதம் ஜனாதிபதிக்கு அனுப்பப்பட்டுள்ளதாக, லஞ்ச ஊழல் விசாரணை ஆணைக்குழுவின் தகவல்கள் தெரிவித்தன. லஞ்ச ஊழல் ஆணைக் குழுவின் மூன்று ஆணையாளர்களின் கையெழுத்துடன் இந்த கடிதம், ஜனாதிபதி மைதிரிபால சிறிசேனவுக்கு அனுப்பி வைக்கப்பட்டுள்ளதாக அந்த தகவல்கள் சுட்டிக்காட்டின.
ஜனாதிபதி மைத்திரிபால சிறிசேன நேற்று முன் தினம் இலங்கை மன்றக் கல்லூரியில் இடம்பெற்ற நிகழ்வொன்றில், குற்றப் புலனாய்வுப் பிரிவு மற்றும் நிதிக் குற்றப் புலனாய்வுப் பிரிவு மற்றும் லஞ்ச ஊழல் ஆணைக் குழு ஆகியன அரசியல் நிகழ்ச்சி நிரலின் கீழ் செயற்பட்டால் கடுமையான தீர்மானம் எடுக்க வேண்டி ஏற்படும் என எச்சரித்திருந்தார்.
அத்துடன் முன்னாள் பாதுகாப்பு செயலாளர் மற்றும் முன்னாள் கடற்படை தளபதிகள் மூவரை நீதிமன்றில் ஆஜர்படுத்திய முறைமையையும், ஜனாதிபதி விமர்சனம் செய்திருந்ததுடன் விசாரணை ஆணைக் குழுக்கள் தன்னை தெளிவுபடுத்தாது இந் நடவடிக்கையை முன்னெடுத்ததாகவும் கூறியிருந்தார்.
இந் நிலையிலேயே லஞ்ச ஊழல் விசாரணை ஆணைக் குழு, இந்த கடிதத்தை அனுப்பி வைத்துள்ளதாக உள்ளக தகவல்கள் தெரிவிக்கின்றன.
