கண்டியில் சஜித் தோல்வியடைய காரணம் என்ன: லக்ஷமன் கிரியெல்ல, மனோ ஆகியோருக்கிடையில் கடும் வாக்குவாதம்
ஜனாதிபதி தேர்தலில் ஐக்கிய தேசியக் கட்சி கண்டியில் தோல்வியடைவதற்கு மத்திய அதிவேக வீதி நிர்மாணத்தில் ஏற்பட்ட தாமதமே காரணமென அமைச்சர் லக்ஷ்மன் கிரியெல்ல நேற்று புதன்கிழமை அலறி மாளிகையில் நடைபெற்ற கட்சித் தலைவர்கள் அமைச்சர்கள் கூட்டத்தில் தெரிவித்தமையை அடுத்து, அவருக்கும் அமைச்சர் மனோ கணேசனுக்கும் இடையில் கடுமையான வாக்குவாதம் ஏற்பட்டது.
ரணில் விக்கிரமசிங்க தலைமையில் அலரி மாளிகையில் நேற்று நடைபெற்ற அமைச்சர்கள் மற்றும் கட்சித் தலைவர்கள் கூட்டத்தில் மனோ கணேசனுக்கும் லக்ஷ்மன் கிரியெல்லவுக்குமிடையில் இந்த வாக்குவாதம் இடம்பெற்றுள்ளது.
இந்தக் கூட்டத்தில், கண்டியில் ஐக்கிய தேசியக் கட்சி தோல்வியடைவதற்கு மத்திய அதிவேக வீதி நிர்மாணத்தில் ஏற்பட்ட தாமதமே காரணமென அமைச்சர் லக்ஷ்மன் கிரியெல்ல தெரிவித்தார்.
இதனையடுத்து லக்ஷ்மன் கிரியெல்லவின் கருத்தை நிராகரித்த அமைச்சர் மனோ கணேசன், மத்திய அதிவேக வீதி நிர்மாண தாமதம் தோல்விக்குக் காரணமல்ல என்றும், “நீங்கள் கண்டியில் தேர்தல் பிரசாரப் பணிகளில் முறையாக ஈடுபடாமையே தோல்விக்கு காரணம்” என்றும் சுட்டிக்காட்டியிருக்கிறார்.
இதனையடுத்து இரண்டு பேருக்குமிடையில் கடும் வாக்குவாதம் ஏற்பட்டிருக்கிறது. தான் கண்டி மாவட்டத்தில் அனைத்துப் பிரதேசங்களிலும் ஒழுங்கான முறையில் பிரசாரங்களை முன்னெடுத்ததாக அமைச்சர் லக்ஷ்மன் கிரியெல்ல தெரிவித்திருக்கிறார்.
