இலங்கையிலுள்ள அமெரிக்கத் தூதரகத்தைத் தாக்குவதற்கு, விமானம் தேவையில்லை: பசீர் சேகுதாவூத்

இனியென்ன? பௌத்த தீவிரவாதம் காய்த்து விடும். தொடர்ந்து குழி வெட்டி, காயைப் புதைத்து புகையடித்து பழுக்க வைத்தும் விடுவார்கள். பழுத்தால் அழுகித்தானே ஆகணும். ஆனால் அழுகினாலும் விதை மிஞ்சுமல்லவா? விதை மீண்டும் புதைக்கப்பட்டால் முளைத்துத்தானே ஆகும்?

கடந்த ஆட்சியில் இயங்கிய பௌத்த மென் தீவிரவாதத்தை செறிவான தீவிரவாதமாக மாற்றிச் செயலாக்கினால்தான் ‘சிங்களக் கதாநாயக அரசியல்வாதிகளின்’ செல்வாக்கை வீழச் செய்து, அதனை தம் வசப்படுத்தலாம் என நம்பும் நல்லாட்சி அரசியல்வாதிகள், அழுகுவதைப் பற்றி அறிந்திருக்க நியாயமில்லை. ‘டப்பாவைத் திறந்து’ அனுபவம் பெறுகிற போது, எரியும் இலங்கைத் தீவைக் காப்பாற்றுவதற்கு சுற்றிவர நிறைந்திருக்கும் கடல் நீர் போதாமல் போகலாம்.

அமெரிக்காவில் அமைந்திருக்கும் அதியுயர் கட்டிடங்களைத் தாக்குவதற்கு வேண்டுமானால், அமெரிக்காவின் உதவியுடன் விமானங்களைக் கடத்தும் தேவை ஏற்படலாம். ஆனால் இலங்கைத் தூதரகத்தை தாக்குவதற்கு விமானம் தேவைப்படாது என்பது, உங்கள் நண்பர்களிடம் பயிற்சி பெற்றவர்களுக்குத் தெரியாமலா இருக்கும்?

மாற்றி யோசிக்கத் தெரிந்த உலகின் மிகச்சிறந்த புலனாய்வாளர்களே! மிகக் கவனம்!!
கடுமையான பாதுகாப்பு ஏற்பாடுகளோடு, கடலோரத்தில் ஒய்யாரமாக வீற்றிருந்து ஆட்சி செய்யும் தூதரகத்தை தாக்குவதற்கு திட்டமிடும் ‘பயங்கரவாதிகள்’, உங்களை ஏமாற்றுவதற்காக விமானத் தாக்குதல் என்று கதையை ஒழுகவிட்டு ஏமாற்றி, கடலைப் பயன்படுத்திக் கொள்ளக் கூடும்.

மேலும் நீங்கள், தூதரகத்தை விடவும் மிகவும் பாதுகாப்புக் குறைந்த உங்கள் தூதருடைய வாசஸ்தலத்தின் பாதுகாப்பு பற்றி மூச்சே விடவில்லையே ஏன்? ஐ.எஸ்.ஐ.எஸ். இலகுவான இலக்குகளைத் தெரிவு செய்வதில்லை என்று நம்புகிறீர்களா? அல்லது இது உங்களின் இன்னொரு எபிசோட் வியூகத்துக்கு தேவைப்படும் என்பதால் இப்போதைக்கு விட்டு வைத்திருக்கிறீர்களா?